Istanbul reyting turnirining uchinchi kuni erkin kurashchilarimiz uchun qanday o'tdi?

Afsuski, ayni daqiqalarda davom etayotgan musobaqaning uchinchi kungi bahslari O'zbekiston ayollar va erkin kurash terma jamoasi uchun omadsiz keldi. Biroz avval medal uchun so'nggi umidimiz Jasmina Immaeva ham raqibasiga yutqazib qo'ydi. 50 kg vaznda yurtimiz sharafini himoya qilgan O'zbekiston chempioni bronza medali uchun bahsda bolgariyalik Miglena Selishkaga 0-6 hisobida imkoniyatni boy berdi. 

Bugun boshlangan erkin kurash musobaqasida esa uch nafar vakilimiz medallar uchun bahs olib bordi va afsuski ular ham medallar uchun kurash bosqichiga etib kela olishmadi. Ikki yillik tanaffusdan so'ng katta sportga qaytgan Hasanboy Rahimov 1/8 finalda germaniyalik Gennadiy CHudinovichga 1-8 hisobida yutqazib qo'ydi. 125 kg vazn toifasidagi kurashchimiz ilk davrada qozog'istonlik Alisher Ergalidan 8-4 hisobida ustun kelgandi. Ushbu vazndagi ikkinchi vakilimiz Sardor Xolmatov esa turkiyalik kurashchidan 6-7 hisobida engildi.   

Bugun shuningdek, 97 kg vazn toifasidagi erkin kurashchimiz Muhammadrasul Rahimov ham musobaqada o'z imkoniyatini sinab ko'rdi. Aamaldagi O'zbekiston chempioni bo'lgan Muhammadrasul bronza medali yo'lidagi o'tish bahsida qozog'istonlik Mamed Ibragimovga 4-6 hisobida imkoniyatni boy berdi.