Ixtisoslashtirilgan dzyudo zallarining faoliyati takomillashtiriladi

O'zbekiston dzyudo federaciyasida viloyatlarda foydalanishga topshirilgan ixtisoslashtirilgan dzyudo zallarining bugungi faoliyatini monitoring qilish, ish faoliyatini yanada takomillashtirish, u erga imkon qadar ko'proq bolalarni qamrab olish masalalariga bag'ishlangan yig'ilish bo'lib o'tdi. 

ZOOM platformasida o'tgan yig'ilishga O'zbekiston dzyudo federaciyasi raisi o'rinbosari Zafar Qahramonov boshchilik qildi. Unda Federaciyaning viloyatlardagi bo'limlari rahbarlari, ixtisoslashtirilgan dzyudo zallariga masullar ishtirok etishdi. 

Xabaringiz bor, O'zbekiston dzyudo federaciyasi Xalq talimi vazirligi hamda qator hamkor tashkilotchilar bilan birgalikda Qoraqalpog'iston Respublikasi, Toshkent shahri va barcha viloyatlarda ixtisoslashtirilgan dzyudo zallari qurib, foydalanishga topshirmoqda. Bu zallarning aksariyatida bugungi kunda bolajonlar dzyudo sir-asrorlarini o'rganishyapti. Yil so'nggiga qadar qolgan dzyudo zallarining ham yoshlar ixtiyoriga topshirilishi rejalashtirilgan. 

Yig'ilishda so'z olgan Zafar Qahramonov ixtisoslashtirilgan dzyudo zallarida shug'ullanayotgan yoshlar sonini maksimal darajada ko'paytirish, ularning ushbu sport turiga qiziqishini oshirish maqsadida dzyudo yulduzlari ishtirokida mahorat saboqlarini tashkil etish, ko'proq ichki musobaqalarni o'tkazish, mashg'ulotlarga malakali murabbiylarni jalb qilish kerakligini urg'uladi.

"Bu dzyudo zallari xo'jako'rsinga qurilayotgani yo'q. Katta mablag' sarflanyapti. Davlatimiz tomonidan shuncha etibor qilinmoqda. Endi bu imkoniyatlardan maksimal darajada foydalanishimish shart. Ixtisoslashtirilgan dzyudo zallarida ayol murabbiylarimiz ham ishlashi lozim. Har oy zallarning faoliyatini monitoring qilib boramiz", - dedi Z.Qahramonov. 

Yig'ilish so'nggida o'z imkoniyatidan past darajada ishlayotgan dzyudo zallari masullariga tegishli ko'rsatmalar berildi.