10 sen 11:31
Yangiliklar

Sport kurashlari, Kurash

Jahon chempionati. Erkin kurashchilarimizdan 2ta medal

Greciya poytaxti Afina shahrida sport kurashlari - erkin, yunon-rum va ayollar kurashi bo'yicha o'smirlar o'rtasidagi jahon chempionati davom etmoqda.

Musobaqaning erkin kurash bahslarida hamyurtlarimizdan ikki nafari shoxsupaga ko'tarildi. -42 kg vazn toifasida gilamga chiqqan Umidjon Jalolov finalga qadar mag'lubiyatsiz etib borib, jahon chempionatining kumush medali bilan taqdirlandi.

U hal qiluvchi final bellashuvida ozarbayjonlik Alihasan Amirliga 0:1 hisoida yutqazib qo'ydi. Jalolov finalgacha mo'g'ulistonlik Xishigdosh Batbayarni 10:0, eronlik Mehrdod Mahdi Veysini 4:1, gruziyalik Giorgi Tcholadzeni 6:4, yarim finalda esa turkiyalik Yusuf Erichelni 10:0 hisobida taslim etdi.

Jahon chempionatining bronza medali Farrux SHaripovga nasib etdi. -50 kg vazn toifasidagi kurashchimiz bronza medali uchun kechgan bahsda turkiyalik Dogan Karadan ustun keldi.