Jahon chempionati oldidan: O'zbek taekvondochilari bungacha kadetlar o'rtasidagi JCHlarda qanday ishtirok etishgan?

Kadetlar o'rtasidagi dastlabki Jahon chempionati 2013 yilda Ozarbayjon poytaxti Boku shahrida o'tkazilgan. Tarixiy musobaqada O'zbekiston terma jamoasi bitta medalni qo'lga kiritgan. +65 kilogramm vazn toifasida taekvondochimiz Islomjon Adhamov bronza medaliga ega chiqib O'zbekiston tarixidan o'rin olgan. 

Ikkinchi Jahon chempionatiga esa 2015 yilda Janubiy Koreyaning Muju shahri mezbonlik qilgan. Bu safar sportchilarimiz yurtimizga ikkita bronza medali bilan qaytishgan. -33 kg vazn toifasida Jasurbek Zokirov va +65 kg vazn toifasida yana o'sha Islomjon Adhamov O'zbekiston terma jamoasiga medallar keltirishgandi. SHu tariqa, Adhamov ketma-ket ikkita Jahon chempionatida medal olgan birinchi o'zbekistonlik taekvondochi bo'lgan .

Ikki yil muqaddam Misrning SHarm El SHeyx shahrida hisob bo'yicha III Jahon chempionati o'tkazilgan. Bu safar taekvondochi kadetlarimiz oldingi natijani ikki baravar yaxshilashgan va 4ta bronza medalni qo'lga kiritishgan. Etiborlisi o'sha Jahon chempionatida O'zbekiston ilk bor qizlar o'rtasidagi musobaqada ham sovrindor bo'lgan. 

2017 yilgi Jahon chempionatida Munisa Karimova (-29 kg), Umidaxon Hasanova (-47 kg), Daniil Kim (-33 kg) va Amirbek To'raev (-37 kg) medallarga ega chiqishgan.   

Toshkentda o'tkaziladigan jahon chempionatida sportchilar 20ta vazn toifasida (o'g'il bolalar 10 ta, qizlar 10 ta) kurash olib borishadi. O'zbekiston terma jamoasi ushbu Jahon chempionatida to'liq tarkibda ishtirok etadi. Barcha sportchilarimizga omad tilaymiz!

O'zbekiston taekvondo WTF associaciyasi matbuot xizmati