Jahon kubogi bosqichi va “Happy Caravan” turniri yakunlandi

Ananaviy tarzda o'tkaziladigan go'zallik va nafosat bayramida O'zbekiston, AQSH, Belarus, Janubiy Koreya, Ispaniya, Isroil, Malayziya, Polsha, Rossiya, Xitoy, Estoniya, Yaponiya, Qozog'iston, Armaniston kabi davlatlardan 100 dan ortiq gimnastikachi g'oliblik uchun bahslashdi.

Mazkur musobaqalarda gimnastikachilar yakkalik va guruh bahslarida ko'pkurash va alohida gimnastika predmetlari yordamida mashq bajarish bo'yicha o'z imkoniyatlarini sinovdan o'tkazdi.

Jahon kubogi bosqichining alohida gimnastika predmetlari yordamida mashq bajarish bo'yicha shaxsiy bahslarda sportchimizlarimiz Anastasiya Serdyukova to'p va tasmada mashq bajarishda ikkita bronza medalini qo'lga kiritgan bo'lsa, Elizaveta Nazarenkova bulavada mashq bajarish bo'yicha uchinchi o'rinni egalladi.

Ananaviy tarzda o'tkazib kelinayotgan “Happy Caravan” xalqaro turnirining shaxsiy hisobdagi musobaqasida hamyurtlarimizdan Nuriniso Usmonovaning arg'amchi, halqa va to'p bilan bajargan mashqlari uchta bronza medalga loyiq topildi. Yana bir gimnastikachimiz Milana Tyan bulavada mashq bajarishda bronza medal bilan taqdirlandi.

O'zbekiston Milliy Olimpiya qo'mitasi matbuot xizmati