Jahongirmirzo oltin, Ixtiyor, Amirjon va Rustam esa bronza medali uchun gilamga chiqadi

Xabar berganimizdek, bugun erkin kurash musobaqasida 5 ta vazn toifasida g'olib va sovrindorlar nomi malum bo'ladi. Biroz avval saralash bellashuvlari yakunlanib, kechki dasturda medallar uchun gilamga chiqadigan erkin kurashchilar nomi malum bo'ldi. 

Etiborga molik jihati shundaki, bugun bahslarga kirishgan 5 kurashchimizdan 4 nafarida Osiyo chempionatidan medal bilan qaytish imkoniyati bor. 61 kg vazn toifasida yurtimiz sharafini himoya qilayotgan Jahongirmirzo Turobov Osiyo chempionligi uchun qozog'istonlik Adlan Askarovga qarshi gilamga chiqadi. U chorak finalda yaponiyalik SHoya SHimaeni 5-2, yarim finalda esa koreyalik Kim Sung Gvonni 4-0 hisobida engdi. 

Rio-2016 Olimpiadasining bronza medali sovrindori Ixtiyor Navro'zov ilk bellashuvida mag'lubiyatga uchragan bo'lsa-da, lekin o'tish bahsi orqali bronza medali uchun kurashish imkoniyatini qo'lga kiritdi. O'tish bellashuvida koreyalik Li Syong CHuldan ustun kelgan Navro'zov endi bronza medali uchun turkmanistonlik Atamirat CHarlievga qarshi bahs olib boradi. 

92 kg vazndagi kurashchimiz Rustam SHodiev ham bronza medali uchun kurashadi. Uning raqibi hindistonlik Sanjit Sanjit bo'ladi. SHodiev chorak finalda qirg'izistonlik CHingiz Kerimkulovni 9-1 hisobida engib, yarim finalda eronlik Kamran Gasempurga imkoniyatni boy berib qo'ygandi.

Terma jamoamizning eng og'ir - 125 kg vazn toifasidagi vakili Amirjon Nutfullaev yaponiyalik Taiki Yamamotoni 11-6, tojikistonlik Rustam Iskandarini 19-14 hisobida dog'da qoldirdi. Ammo, yarim finalda mezbon kurashchi Oleg Boltinga yutqazdi. Amirjon Osiyo chempionatining bronza medali uchun mo'g'ulistonlik Xuderbulga Dorjkandga qarshi gilamga chiqadi.