Jalolovga ikki bor yutqazgan Torres davogarlik jangida ringga chiqadi

Xalqaro boks federaciyasi (IBF) 22 yanvar kuni superog'ir vazn toifasida kubalik Frenk Sanches (reytingda 3-o'rin) va amerikalik Richard Torres (reytingda 4-o'rin) o'rtasidagi Eliminator, yani saralash jangini o'tkazish uchun ochiq savdo o'tkazadi. Ushbu jang g'olibi ukrainalik Aleksandr Usik egalik qilib turgan IBF chempionlik kamari uchun majburiy davogarga aylanadi.

Aslida Sanches va Torres o'rtasidagi jang o'tgan yilning dekabr oyi boshidayoq belgilangandi. Lekin bokschilarning jamoalari jang o'tkazish bo'yicha ikki tomonlama muzokaralarni yakunlash uchun muhlat olishdi. Yakunda ular belgilangan muddatda kelisha olishmadi va IBF ochiq savdo sanasini belgiladi.

SHunga qaramay, savdo boshlanishidan oldin Sanches va Torres vakillarida jang bo'yicha kelishuvga erishish imkoniyati bor.

Eslatib o'tamiz, charm qo'lqop ustamiz Bahodir Jalolov ikki bor Richard Torresni mag'lubiyatga uchratgan edi. Avvaliga 2019 yil Ekaterinburgdagi jahon chempionatida hamyurtimiz amerikalik raqibini chuqur nokautga uchratgan. Keyin esa Tokio-2020 Olimpiadasi finalida ham raqibidan ustun kelgan.