Jasmina va Madina Osiyo chempionatining kumush medali sohibalari

Xabar berganimizdek, bugun qita chempionatida ayollar kurashi vakilalari bahslarga kirishishdi. Bugun beshta vazn toifasida g'olib va sovrindorlar nomi malum bo'ldi. Final bellashuvlarida to'rt nafar kurashchi-qizimizning gilamga chiqishi malum bo'lgandi. 

50 kg vaznda yurtimiz sharafini himoya qilgan Jasmina Immaeva Osiyo chempionatining oltin medali uchun kechgan bahsda qozog'istonlik Valentina Islamovaga yutqazdi va kumush medalga ega chiqdi. 

55 kg vazndagi sportchimiz Madina Usmonjonova ham Osiyo chempionatining kumush medali bilan taqdirlandi. Jasminadan farqli ravishda Madinaning vaznida bahslar aylana tarzida o'tkazildi va unda Usmonjonova ikkita bellashuvni o'z foydasiga hal qildi. U so'nggi uchrashuvda qozog'istonlik Aysha Ualishandan 4-1 hisobida ustun keldi. 

59 kg vazndagi kurashchimiz Dilfuza Aymbetova bronza medali uchun qirg'izistonlik Nurayda Anarkulovaga, 68 kilogrammda Azoda Esbergenova esa koreyalik Jeong Sunga imkoniyatni boy berdi. 

SHu tariqa, bugungi bahslarni O'zbekiston ayollar terma jamoasi 2 ta kumush medal bilan yakunladi. Ertaga qolgan 5 ta vazn toifasida bellashuvlar o'tkaziladi.