Jasur Boyqo'ziev: "Jahon chempionatida taekvondochilarimiz tarixdagi eng yaxshi natijani qayd eta oladilar"

Ayni kunlarda O'zbekiston terma jamoasi ham musobaqaga jiddiy hozirlik ko'rmoqda. Terma jamoamiz murabbiylar shtabida Osiyo o'yinlari chempioni, jahon chempionati sovrindori, tajribali taekvondochi Jasur Boyqo'ziev ham faoliyat olib bormoqda. 

Biz oldinda turgan jahon chempionati oldidan Jasur Boyqo'zievning fikrlari bilan qiziqdik. 

"Hozirgi kunda O'zbekiston kadetlar terma jamoasida katta murabbiy Sobir Nazaralievga yordamchi sifatida ish olib boryapman. Sportchi bo'lganim uchun murabbiylik sohasida ham o'zimni sinab ko'rmoqchi bo'ldim. Terma jamoaga kelib, murabbiylik qanday qiyin soha ekanligini his qildim. Sababi siz sportchi bo'lsangiz faqat o'zingiz uchun harakat qilasiz. Murabbiy sifatida esa qo'l ostingizdagi barcha sportchiga etibor qaratishingiz lozim bo'ladi. To'g'risini aytsam bu juda qiyin ekan.  

Sportchi zalga keladi, belgilangan reja asosida mashg'ulotlarini olib boradi va keyin dam olishi mumkin bo'ladi. Murabbiy esa mashg'ulotlardan so'ng ham izlanishdan to'xtamasligi lozim. Siz olib borilgan mashg'ulotlarni tahlil qilishingiz, turli rejalar tuzishingiz va raqiblarni o'rganishingiz lozim bo'ladi. 

SHuning uchun qo'ldan kelgancha kadetlar terma jamoasining muvaffaqiyatli ishtiroki uchun katta murabbiyga yordam berib kelyapmiz. Hozirgi kunda terma jamoamiz safidagi yosh sportchilarimiz harakatchan va mehnatsevar. O'ylaymanki, ushbu jahon chempionatida taekvondochilarimiz tarixdagi eng yaxshi natijani qayd eta oladilar.

Musobaqaning tashkiliy jihatlari haqida gapiradigan bo'lsam, ayni paytda mazkur musobaqaga tayyorgarlik jiddiy davom etmoqda. Bu borada tashkiliy qo'mita tomonidan katta hajmda ish olib borilmoqda. Ishonamanki, O'zbekiston bunday tayyorgarlik bilan jahon chempionatini yuqori saviyada o'tkaza oladi", - dedi Jasur Boyqo'ziev.