Javohir Sindarov sardorligidagi jamoa shohsupada, Magnus chempion bo'la olmadi! (+FOTO)

O'z tarkibiga yulduz shaxmatchilarni jamlagan oltita jamoa ishtirokidagi musobaqa murosasiz kurashlar ostida o'tdi. Nufuzli turnirning so'nggi kuni chempionlik va uchinchi o'rin uchun bahslar o'tkazildi. 

Hamyurtimiz Javohir Sindarov musobaqaning bu yilgi mavsumida Fyers American Gambits jamoasi sharafini himoya qildi. Javohirning jamoasidan qozog'istonlik Bibisara Assaubaeva, rossiyalik Danil Dubov, hindistonlik Nihal Sarin, franciyalik Mark-Andria Mauricci hamda ispaniyalik xalqaro master Sara Hadem joy olgandi. Sindarov sardor sifatida barcha uchrashuvlarini jamoasining birinchi —  Icon taxtasida raqib jamoalarning birinchi raqamli shaxmatchilariga qarshi dona surdi.

Tech Mahindra Global Chess League turnirining so'nggi kuni Javohir Sindarov boshchiligidagi Fyers American Gambits jamoasi franciyalik taniqli grossmeyster Maksim Vashe-Lagrav sardorligidagi Cheq Mumba Masters jamoasiga qarshi bronza medallari uchun bahs olib bordi. Fyers American Gambits har ikki uchrashuvda ham g'alaba qozonib (4:2, 3,5:2,5), musobaqaning bronza medalini qo'lga kiritdi. 

Turnir chempionligi uchun kechgan bahsda Magnus Karlsen boshchiligidagi Alpine Apl Pipers jamoasi Yan Nepomnyashiy sardorligidagi Ganges Grandmasters jamoasiga biroz kutilmaganda imkoniyatni boy berib, kumush medallar bilan kifoyalandi. Ganges Grandmasters chempionlik shohsupasiga ko'tarildi. 

Musobaqa chempioni Ganges Grandmasters bosh sovrin bilan birga 250 000 AQSH dollari miqdoridagi mukofot pulini ham qo'lga kiritdi. Kumush medal sohiblari Alpine Apl Pipers jamoasi 125 000, bronza medal egalari Fyers American Gambits jamoasi 75 000 dollarga ega chiqdi. To'rtinchi o'rinni band etgan Cheq Mumba Masters jamoasi 50 000 AQSH dollari bilan taqdirlandi.