Jizzaxda BMX trassasining qurilishi qanday kechmoqda?

O'zbekiston velosiped sporti federaciyasi va Jizzax viloyati hokimligi hamkorligida kechayotgan mazkur obekt qurilishi ayni avjida. Hozirda trassaning tamal qismi ustida ish olib borilmoqda. Keling, shu orada bo'lajak trassa haqida malumot berib o'tsak.

Trassa CC, yani qita chempionatlari va jahon kubogi bosqichlarini qabul qila oladigan toifada bo'ladi. Bo'lajak arena 2500 muxlis uchun mo'ljallangan. Ahamiyatlisi, maydonning yon qismida 100 kishilik mehmonxona va biznes-markaz ham barpo etiladi. Malum darajaga etgach (mamlakatimizda xalqaro parvozlarga ruxsat berilgandan so'ng) xalqaro ekspertlar yurtimizga tashrif buyurib, qurilishning asosiy jarayoni ustida bosh-qosh bo'lishadi. Hozircha mahalliy quruvchilar videomuloqot orqali ekspertlardan tegishli ko'rsatmalarni olib turishibdi.

"Qurilish ishlari yakunlangach, VMX yo'nalishi bo'yicha jahonning eng kuchli rayderlari ishtirokida arenaning ochilish marosimini o'tkazish rejalashtirilgan. Mehmonlar bunda ko'rgazmali sinov musobaqasida qatnashadilar va jarayon ko'ngildagidek yakunlangach, Xalqaro velosportchilar ittifoqi maxsus komissiyasining SS sertifikati berilishi kutilmoqda. 

Trassaning ochilishi esa kuz faslining ilk kunlariga mo'ljallangan. Bu yo'nalish bilan shug'ullanuvchi professional sportchilarimiz sanoqli. Kelajakda hukumatimizning qo'llab-quvvatlashi bilan xorijlik mutaxassislarni jalb qilish orqali VMXni ham yurtimizda rivojlantirish rejamiz bor", – dedi O'zbekiston velosiped sporti federaciyasi Bosh kotibi Kozim O'rinboyxo'jaev.

Trassa haqida gapiradigan bo'lsak, u 2 ta (5 va 8 metri) start chizig'iga ega bo'ladi. Bunda 5 metrli hudud mashg'ulot jarayonlari va havaskorlar uchun mo'ljallangan bo'lsa, katta chiziqda professional poygalarga start beriladi. Trassa qurilishi yakunlangach, 5 metrli start chizig'iga ega hududda ushbu yo'nalishga qiziqqan istalgan yoshdagi inson o'zini VMX yo'nalishida sinab ko'rishi mumkin.

2022 yil Senegalda bo'lib o'tadigan to'rtinchi o'smirlar Olimpiya o'yinlari dasturiga ushbu sport turi kiritilgan. Bunday zamonaviy inshootning qurilishi nafaqat shosse va trek, balki VMX yo'nalishida ham o'smirlar va kattalar Olimpiadalariga munosib tayyorgarlik ko'rish imkoniyatini taqdim qiladi.