Jonibek Otabekov - jahon chempionati sovrindori!

Bu haqda O'zbekiston sport kurashlari associaciyasi matbuot xizmati xabar bermoqda. Birlashgan sport kurashlari associaciyasi (UWW) Rio-2016 Olimpiadasi o'yinlariga har bir yo'nalishda mavjud 8ta vazn toifasidan 2tasini kiritmagan edi.

Aynan mana shu vaznlarda jahon chempionati tashkil etildi. Yilning so'nggi nufuzli musobaqasida erkin va yunon-rum kurashi bo'yicha O'zbekiston terma jamoasi polvonlari ham o'z imkoniyatlarini sinovdan o'tkazishdi.

Yakunda hamyurtlarimizdan faqat bir nafari sovrindorlar safidan joy oldi. Yunon-kurashi bahslarida 2015 yilgi Osiyo chempionati sovrindori Jonibek Otabekov bronza medali bilan taqdirlandi.

80 kg vazn toifasida gilamga chiqqan Otabekov bronza medali uchun kechgan bahsda gruziyalik Nikolaz Kelasovni mag'lubiyatga uchratdi. U nimchorak finalda xorvatiyalik Nenad Jugayani 6:4, chorak finalda yaponiyalik Soxa Sakabedan 6:3 hisobida ustun kelgandi.

Lekin yarim finalda rossiyalik Ramazan Abacharaevga 0:6 hisobida imkoniyatni boy berib qo'ydi.

Erkin kurash bahslarining 70 kg vazn toifasida gilamga chiqqan hamyurtimiz Rashid Qurbonov esa bronza medali uchun o'tkazilgan uchrashuvda eronlik Mustafa Xuseynxoniga kichik hisobda yutqazib qo'ydi.