Karate bo'yicha O'zbekiston kubogida yuz bergan holat yuzasidan rasmiy malumot berildi

Unda musobaqa hakami Bo'riev Azizbek Eshboevich, Toshkent viloyati “CHempion” karate sport klubi treneri Yusupov Dilshod Marupovich hamda Surxondaryo viloyati karate milliy federaciyasi treneri Ismatullaev Abdulaziz Inoyatullaevichlar o'rtasida musobaqa yakuniy natijasi yuzasidan o'zaro tortishuv kelib chiqqan. Mazkur kelishmovchilik oqibatida biron bir shaxs tan jarohati olmagan. Ushbu holat yuzasidan O'zbekiston karate milliy federaciyasi rayosati yuqoridagi sport mutaxassislariga nisbatan xizmat tekshiruvi tayinladi.

Tekshiruv yakuni yuzasidan O'zbekiston karate milliy federaciyasi hakami Bo'riev A.E.ni ikki yilga hakamlik ish faoliyatidan chetlashtirish, Surxondaryo viloyat karate milliy federaciyasi treneri Ismatullaev A.I.ni uch yilga va Toshkent viloyati “CHempion” karate sport klubi treneri Yusupov D.M.ni ikki yilga trenerlik faoliyatidan chetlashtirish haqida qaror qabul qilindi. Musobaqa bosh hakami Qoraboev Qosimjon Hoshimovichga esa hayfsan elon qilindi.

O'z navbatida O'zbekiston Respublikasi Jismoniy tarbiya va sport vazirligi mazkur holat ishtirokchisi, karate bo'yicha O'zbekiston o'smirlar milliy terma jamoasi katta treneri hamda oliy toifali trener (2018 yil 19 noyabrdagi 985-sonli buyruq, guvohnoma raqami #0158) Bo'riev A.E. Vazirlar Mahkamasining 2012 yil 14 iyundagi 173-son qarori bilan tasdiqlangan Sport terma jamoalari to'g'risidagi nizomga ko'ra manaviy-axloqiy va boshqa normalarni buzganligi sababli milliy terma jamoa tarkibidan chiqarildi.

O'zbekiston Respublikasi Jismoniy tarbiya va sport vazirligi mazkur holatni o'z nazoratiga olgan.

Jismoniy tarbiya va sport vazirligi Matbuot xizmati