Karate WKF: “Istanbul Premier League” turnirida hamyurtimiz finalga chiqdi

Xabar berganimizdek, shu kunlarda Turkiyaning Istanbul shahrida karate bo'yicha nufuzli “Istanbul Premier League” xalqaro turniri bo'lib o'tmoqda. Unda O'zbekiston terma jamoasi azolari ham ishtirok etishyapti.

Quvonarlisi, kecha bo'lib o'tgan saralash bahslaridan so'ng terma jamoamizning ikki nafar vakili medallar uchun kurashadigan bo'lishdi. Jumladan, dunyoning 60ta davlati vakillari ishtirok etayotgan musobaqada hamyurtimiz, -75 kg vazn toifasida tatamiga tushgan Doston Otabolaev finalga yo'llanma oldi. U oltin medal uchun kechadigan jangda italiyalik Luiji Busaga qarshi tatamiga tushadi.

Yana bir vakilimiz, -60 kg vazn toifasida ishtirok etayotgan Sadriddin Saymatov esa bronza medali uchun jang qiladi. Medallar uchun kechadigan janglar 14 mart sanasiga belgilangan.

“Istanbul Premier League” xalqaro turniri finalchisi Dostonbek Otabolaev o'z fikrlari bilan o'rtoqlashdi:

«Ushbu yutuqlarimiz zamirida Jismoniy tarbiya va sport vazirligi hamda O'zbekiston Milliy olimpiya qo'mitasining xizmatlari juda katta. Uch oy mobaynida olib borilgan mashg'ulotlar o'z mahsulini berdi. Men bu muvaffaqiyatim uchun barcha ustozlarimga, xususan yurtboshimiz SHavkat Mirziyoevga sportga qaratayotgan yuksak etiborlari uchun minnatdorlik bildiraman va albatta yurtimiz bayrog'ini yuqori ko'tarishga harakat qilaman».

Biz ertaga bo'ladigan janglarda hamyurtlarimiz Sadriddin Saymatov hamda Doston Otabolaevga omad tilaymiz.