Karatechilarimiz Fujayradagi turnirda muvaffaqiyatli qatnashishdi + FOTO

Ushbu musobaqada 35 davlatdan jami 1700 nafar yoshlar, o'smirlar va kattalar g'oliblik uchun kurash olib borishdi. Karate bo'yicha tajribali murabbiy SHoxrux Jo'raev boshchiligida sport delegaciyamiz mazkur xalqaro musobaqada ishtirok etib, 3 ta oltin, 3 ta kumush va 7 ta bronza medallarini qo'lga kiritdi.

Jumladan, Toshkent shahri sportchilaridan Ali Baxtiyorov yakka kumite baxslarida (10-11 yoshlilar, +30 kg.) birinchi o'rinni qo'lga kiritdi. Yakka kata bahslarida (12-13 yoshlilar)  Umarjon Karimov barcha raqiblarini engib, oltin medal sohibiga aylandi. 

SHuningdek, musobaqada Toshkent viloyati sportchilari ham muvaffaqiyatga erishdi. Xususan, Toshkent tumani sport maktabi va "Keles karate" klubi murabbiyi Dilshod Yusupov boshchiligida sportchilarimizdan Azizbek Islombekov (-60 kg. +18 yoshlilar) oltin medalga sazovor bo'ldi. Jo'rabek Alibekov (14-15 yoshlilar, -52 kg.) bronza medaliga ega chiqdi.

Kecha Toshkent tumani hokimligida murabbiy Dilshod Yusupov va uning chempion shogirdlarini tuman hokimi Odilxon Rustamov va sektor rahbarlari tabriklab, mamlakatimiz obro'sini xalqaro maydonlarda munosib himoya qilayotgani va jismoniy tarbiya va sportni rivojlantirishga qo'shayotgan hissalari uchun tashakkur bildirishdi.

Ilhom RAHMONOV tayyorladi