Karatechilarimiz Turkiyadagi Premier Leaguedan qaytib kelishdi

Unda jahonning 35 davlatidan 607 nafar sportchi ishtirok etdi. Musobaqa yakuniga ko'ra, -50kg vaznda yurtimiz sharafini himoya qilgan Bahriniso Babaeva finalgacha etib borib, kumush medal sohibasiga aylandi.

Bugun musobaqada qatnashgan sportchilarimiz yurtimizga qaytib kelishdi. Ularni Islom Karimov nomidagi Toshkent xalqaro aeroportida Milliy olimpiya qo'mitasi mutasaddilari, O'zbekiston karate Milliy federaciyasi rahbarlari, sportchilarning yaqinlari va ommaviy axborot vositalari xodimlari kutib olishdi.

«Musobaqadagi taassurotlarim juda ham yaxshi. Bunday nufuzli musobaqada ilk marotaba finalgacha etib bordim. To'g'risi, oltin medalni qo'lga kiritish istagim katta edi. O'zbekistonga oltin medal olib kelishni juda istagandim. Bu borada ozgina tajriba etishmadi va mag'lub bo'ldim. Kumush medal bilan kifoyalandim. Xudo xohlasa keyingi safar oltin medalni qo'lga kiritib qaytamiz. Turnir davomida Xitoy Taypeyi, Avstriya kabi mamlakatlar vakillariga qarshi janglar biroz qiyin o'tdi. Keyingi musobaqalarda ushbu kumush medal menga o'ziga yarasha kuch beradi. Nasib qilsa, navbatdagi medal oltin bo'ladi», – dedi sovrindor Bahriniso Babaeva.

Qayd etib o'tish lozimki, ushbu safar O'zbekiston delegaciyasi uchun samarali bo'ldi. Tashrif davomida O'zbekiston karate milliy federaciyasi rahbariyati Eron, Ozarbayjon va Turkiya kabi mamlakatlar karate federaciyasi rahbarlari bilan uchrashib, hamkorlik qilish bo'yicha kelishuvga erishdilar. Unga ko'ra, ushbu mamlakat vakillari yurtimizga kelib master-klass tashkil qiladilar. SHuningdek, terma jamoalar qo'shma o'quv-mashg'ulot yig'inlarini o'tkazish ham rejada bor.

«Sportda avvalambor mashaqqatli mehnat kerak bo'ladi. Musobaqaga jiddiy tayyorgarlik ko'rgandik. Ozroq texnik xatolar sababli musobaqada sovrindorlar safida bo'la olmadim. Endi navbatdagi musobaqaga yanada qattiq tayyorgarlik ko'rib, O'zbekistonga oltin medal bilan qaytaman. Oldinda hali yana ikkita mana shunday musobaqa turibdi. SHuningdek, Osiyo chempionati, Osiyo o'yinlari kabi turnirlar bizni kutib turibdi. Navbatdagi musobaqalarga yangicha taktikalar ishlab chiqqan holda yurtimiz bayrog'ini ko'klarga ko'tarishga harakat qilamiz. Nasib qilsa, keyingi safar oltin medal bilan vatanga qaytamiz.

Turkiyada ham huddi avvalgi raqiblarga qarshi janglar o'tkazdik. Musobaqada dunyo reytingidagi kuchli 64 nafar sportchi ishtirok etadi. U erdagi deyarli har bir sportchi bilan 3-4 marotaba bellashganman. Musobaqa uchun raqibim puxta tayyorgarlik ko'rib, jang uslubimni o'rganib olgan ekan.

Osiyo o'yinlariga tayyorgarlik jarayoni qattiq ketmoqda. Yil davomida hozirgacha ettita musobaqada ishtirok etdik. Turnirlar davomida turli uslublarni ishlatdik. Hali Osiyo o'yinlarida munosib ishtirok etamiz. Ishlab chiqilgan dastur asosida Osiyo o'yinlariga to'liq tayyor bo'lamiz», – dedi Sadriddin Saymatov.