Kechagi ikki oltin medaldan keyin O'zbekiston paralimpiyachilari umumjamoa hisobida nechanchi o'rinda?

Kechagi kun dasturida o'zbekistonlik paralimpiyachilar 2 ta oltin medal qo'lga kiritishdi. Para dzyudochimiz SHerzod Namozov ikki karra, para engil atletikachimiz Husniddin Norbekov uch karra Paralimpiya o'yinlari chempioniga aylandi. Bugungi kun oldidan O'zbekiston sport delegaciyasi 8 ta oltin, 5 ta kumush, 4 ta bronza medali bilan umumjamoa hisobida 12-o'rinni egallab turibdi. Kecha ham 12-pog'onadan joy olgandik. 

Xitoy Respublikasi 74 ta oltin, 55 ta kumush, 37 ta bronza, jami 166 ta medal bilan ro'yxatda katta ustunlik bilan peshqadamlikni davom ettirmoqda. CHin yurti vakillari kechagi bahslarda 10 ta oltin, 6 ta kumush, 8 ta bronza medali qo'lga kiritishdi. O'ttiz oltita oltin, 29 ta kumush, 19 ta bronza medaliga ega Buyuk Britaniya ikkinchi o'rinni egallab turibdi. AQSH sportchilari 27 ta oltin, 33 ta kumush, 17 ta bronza medali bilan kuchli uchlikka yakun yasashgan. Niderlandiya delegaciyasi 21 ta oltin, 10 ta kumush, 5 ta bronza medali to'rtinchi pog'onadan joy olgan.  

Bizdan avvalgi o'rinlarni Yaponiya, Germaniya, Avstraliya, Braziliya, Ukraina, Italiya va Franciya terma jamoalari band etgan. Jami 60 davlat delegaciyalari hisobida kamida 1 tadan oltin medal bor. Kamida 1 ta bronza medalini qo'lga kiritgan davlatlar soni 80 taga etdi.