Keldiyorovaning chempionlik yo'lidagi asosiy figura yoxud Marko Spittka bilan yaqindan tanishamiz

Bugun biz ushbu jarayonga batafsil to'xtalib o'tmaymiz, faqat bir sportchigina nishonimizda bo'ladi. Dzyudochimiz Diyora Keldiyorova Franciyadagi to'rt yillikning eng nufuzli turnirida barcha raqibalarini taslim etib, ayollar o'rtasida Olimpiya o'yinlari chempioniga aylangan ilk o'zbek hamda Markaziy Osiyolik ayol sportchisiga aylandi. Xo'sh, sportchimizning bunday natijaga erishishiga asosiy sababchi kim deb o'ylaysiz? Ha, birinchi navbatda uning ota-onasi, yoshlik chog'ida talim bergan ustozlari, qolaversa, umr yo'ldoshini ham ushbu ro'yxatga qo'shish mumkin. Kimdir qolib ketmadimi? Albatta, shohsupaga ko'tarilish yo'lidagi eng asosiy figura - bu uni Olimpiadaga tayyorlagan murabbiyi Marko Spittkadir! 

Keling, Marko bilan yaqinroqdan tanishib olaylik. Marko Spittka 1971 yil 22 aprelda Germaniyaning Drezden shahrida dunyoga kelgan. U dastlab 78 kg vazn toifasida musobaqalarda ishtirok etgan, keyinroq 90 kg vaznga ko'tarilgan. Marko 1989-1998 yillar davomida dzyudo bo'yicha Germaniya chempionatida 5 marta oltin, bir marta kumush hamda 2 marotaba bronza medaliga sazovor bo'lgan. Xalqaro musobaqalardagi ko'rsatkichlariga qaraydigan bo'lsak, 1992 yilda Evropa chempioni, 1998 yilda qita birinchiligida kumush medalni qo'lga kiritgan. 1997 yilgi jahon chempionatida bronza medalini o'ziniki qilgan bo'lsa, 1996 yil Atlantada bo'lib o'tgan Olimpiya o'yinlarida ham bronza medaliga ega chiqqan. SHuningdek, qahramonimiz yoshlar o'rtasidagi jahon birinchiligida bitta oltin va bitta kumush medalga sazovor bo'lganini ham alohida takidlash lozim. U 7-DAN qora belbog' sohibi hisoblanadi. 

O'zbekiston dzyudo federaciyasi 2022 yil germaniyalik mutaxassis bilan shartnoma tuzgandi. U bundan avval 2007-2019 yillar davomida Avstriya dzyudo terma jamoasi bilan katta natijalarga erishgan. 

O'zbekistonga kelgach, Spittka shunday degandi: “Kuni kecha yakuniga etgan Tel-Aviv “Katta Dubulg'a” turnirida xorijlik do'stlarim O'zbekiston terma jamoasida faoliyat boshlayotganimni eshitib, meni qutlashdi. O'zbek dzyudosini katta kelajak kutmoqda. Yoshlaringizning texnikasi va g'alabaga bo'lgan shijoatiga doim qoyil qolganman. Yangi jamoada o'zimni juda yaxshi his qilyapman. Oldimizga qo'yilgan maqsadlar yo'lida bor kuchimni ishga solaman”. 

Keldiyorova Olimpiada chempioniga aylanganidan keyin germaniyalik mutaxassisning emociyalari aks etgan kadrlar ijtimoiy tarmoqlarda ancha “to'palang” ko'tardi. Bu xuddiki, uning 1996 yilgi bronza medalini qo'lga kiritgan kadridagi tantanaga juda o'xshash. Suratga yaxshilab etibor qaratadigan bo'lsangiz, emociyalar aslida undan kuchliroq. CHunki, Markoga ushbu oltin bir necha soniyalar davomida go'yoki, unikidek tuyuldi. Diyora bu qadar qiyin raqibalarni “er tishlatib”, chempionga aylanishini kamdan-kam ishqibozlar taxmin qilgani tayin. Xursandchilik, shukr, sabr, mehnat aks etgan kadrdagi murabbiy emociyalari esa, kishini beixtiyor entiktirib yuboradi. Sizda shunday tuyg'u jo'sh urmadimi? Unda aybni o'zingizdan qidiring. Butun O'zbekiston bo'lsa “To'marisimiz”ning bu natijasi bilan kamida kelgusi Olimpiadagacha maqtanib yursin. Biz Marko Spittka siymosida o'zbek sportiga mana shunday dunyo miqyosidagi mutaxassislar kerak ekanligiga yana bir bor amin bo'ldik.

Habib Jo'raboev tayyorladi