Kristian SHnayder sport shifokorlarining faoliyati bilan tanishdi

Mutaxassis tashrifi davomida mamlakatimizdagi federaciya va associaciyalaridagi sport shifokorlari bilan uchrashib, ularning faoliyati bilan yaqindan tanishdi. 

Mazkur tadbirda Yoshlar siyosati va sport vaziri Adham Ikramov, MOQ Bosh kotibi Oybek Kasimov va Qo'mita raisining o'rinbosari SHerzod Tashmatov, MOQ qoshidagi Respublika sport tibbiyoti ilmiy-amaliy markazi direktori Kamol Sirojitdinov ham ishtirok etishdi.

Avval xabar berganimizdek, germaniyalik mutaxassis “Toshkent-2025” yoshlar Osiyo va Paraosiyo o'yinlariga sport tibbiyoti yo'nalishida tayyorgarlik ko'rish bo'yicha jalb etilgan. Uning dasturidan mamlakatimizdagi ushbu yo'nalishning holatini o'rganish, sport shifokorlari bilan uchrashib, ularning faoliyati bilan yaqindan tanishish ham o'rin olgan edi.

Suhbat davomida sportchilarimizni qita va jahon chempionati, Osiyo va Olimpiya o'yinlari kabi yirik kompleks musobaqalarga tayyorlashda sport tibbiyoti yo'nalishining qanchalik muhimligi, sohadagi zamonaviy yondashuvlar bo'yicha so'z bordi. 

Tajribali ekspert shifokorlarimizning faoliyatiga yuqori baho berib, hamkorlikning dastlabki qadamlari bo'yicha rejalarni belgilab oldi.