Kurashchi-qizlarimiz Osiyo chempionatini 5 ta medal bilan kuchli beshlikda yakunlashdi

Bugun qizlarimiz (U 17) qita chempionati medallari uchun raqibalariga qarshi bahs olib borishdi. 43 kg vazndagi kurashchi-qizimiz Gulnura Ruslanova aylana tizimda o'tgan bellashuvlar yakunida kumush medal sohibiga aylandi. Gulnura Jazira Nalibaevani (Qozog'iston) 10-0, Mungunsolongo Balsanni (Mo'g'uliston) 11-0, Diana Amanturovani (Qirg'iziston) 6-1 hisobida engib, bo'lajak chempion, hindistonlik Ritika Ritikaga imkoniyatni boy berib qo'ydi.      

49 kg vazn toifasida yurtimiz sharafini himoya qilgan Sandugash Jenbaeva Osiyo chempionatining bronza medaliga sazovor bo'ldi. U uchinchi o'rin sohibini aniqlab bergan uchrashuvda qozog'istonlik Ayimgul Abilovadan 6-2 hisobida ustun keldi. 

Bugungi kun bahslarida terma jamoamizga yana bir medalni Sevinch Sultonova taqdim etdi. 65 kg vaznda kurashgan To'ymurod Adizov shogirdi uchinchi o'rin uchun kechgan murosasiz bellashuvda yaponiyalik Sava Xigashini 8-7 hisobida engdi.

SHu tariqa, kurashchi-qizlarimiz (U 17) Osiyo chempionatini 2 ta kumush, 3 ta bronza medali bilan umumjamoa hisobida kuchli beshlikda yakunlashdi.

Kumush medal

43 kg: Gulnura Ruslanova 

61 kg: Ulmeken Esenbaeva  

Bronza medal

40 kg: Gulasal Abdunazarova 

49 kg: Sandugash Jenbaeva 

65 kg: Sevinch Sultonova