Layloxon Sobirova finalda, qolganlar bronza uchun kurashishadi

Xabar berganimizdek, bugun yoshlar (U 20) o'rtasidagi qita chempionatida ayollar kurashi vakilalalari medallar uchun gilamga chiqishyapti. 57 kg vaznda yurtimiz sharafini himoya qilayotgan Layloxon Sobirova murosasiz kechgan yarim final bellashuvida hindistonlik Sito Sitoni 12-10 hisobida engib, Osiyo chempionatining finaliga yo'l oldi. 

Sobirovaning oltin medal uchun kechadigan bahsdagi raqibasi qozog'istonlik Zeynep Bayanova bo'ladi. Ular ikkinchi davrada o'zaro bellashishgan va unda so'nggi qo'lga kiritilgan ball (6-6) evaziga Bayanova g'alaba qozongan edi.

53 kg vaznda kurashayotgan Dilshoda Matnazarova kechki final dasturida bronza medali uchun gilamga chiqadi. Uning raqibasi yaponiyalik Rio Xattori bo'ladi. Yarim finalda qozog'istonlik Tinis Dubekka yutqazgan (0-10) Rushana Abdurasulova (62 kg) bronza medali uchun koreyalik Seo En Baega qarshi bahs olib boradi. 

65 kg vazndagi terma jamoamiz azosi Gulmira Aytmuratova ham bronza medali uchun bahs olib boradigan bo'ldi. Yarim finalda yaponiyalik Nagisa Itoga imkoniyatni boy (6-12) bergan Aytmuratova bronza uchun qirg'izistonlik Dilnaz Sazanovaga qarshi gilamga chiqadi.