Los-Anjeles-2028 XVIII yozgi Paralimpiya o'yinlarining musobaqalar dasturi elon qilindi

"Xalqaro Paralimpiya qo'mitasi (IPC) boshqaruv kengashi 2028 yilda Amerika Qo'shma SHtatlarining Los-Anjeles shahrida o'tkaziladigan XVIII yozgi Paralimpiya o'yinlarining musobaqalar dasturi va para sportchilar uchun qancha miqdorda yo'llanmalar ajratilishi bo'yicha malumotnomani Milliy Paralimpiya qo'mitalari etiboriga taqdim qildi.

Ahamiyatlisi, Los-Anejelesdagi to'rt yillikning eng muhim turnirida Paralimpiya o'yinlari tarixidagi eng ko'p medallar jamg'armasi o'ynaladi.

Sport turlarining yangilangangan ro'yxatiga ko'ra, Los-Anjeles-2028 Paralimpiya o'yinlarida para qoyani zabt etish sporti bo'yicha ilk bor musobaqalar o'tkaziladi. Yana bir ahamiyatli tomoni, bu safargi o'yinlarda ayol sportchilar ishtirok etadigan dasturlar soni yanada ko'paytirildi. Los-Anjeles-2028 yozgi Paralimpiya o'yinlarida erkaklar o'rtasida 267 ta, ayollar o'rtasida 247 ta, aralash jamoaviy yo'nalishda 46 ta, jami 560 ta dasturda medallar o'ynaladi. Dasturlar soni Parij-2024 yozgi Paralimpiadasiga nisbatan 11 ta ko'p ekanini ham takidlash lozim.

Okean ortida o'tadigan o'yinlar uchun ajratilayotgan umumiy yo'llanmalar soni esa o'tgan yili Franciya mezbonlik qilgan yozgi Paralimpiya bahslaridagidan 80 taga ko'p ekanini ko'rishimiz mumkin. Los-Anjeles-2028 yozgi Paralimpiya o'yinlarida 23 ta sport turi doirasida jami 4480 ta kvota ajratiladi", deyiladi MPQ xabarida.