Medvedev Venada chempionlik unvonini himoya qila olmadi

Dunyoning uchinchi raketkasi Daniil Medvedev hal qiluvchi final uchrashuvida reytingning to'rtinchi pog'onasida borayotgan italiyanlik Yannik Sinnerga 6/7(4), 6/4, 3/6 hisobida yutqazib qo'ydi. Aynan rossiyalik tennischi musobaqaning amaldagi g'olibi edi. O'zaro uchrashuvlarda esa hamon Medvedev katta ustunlik bilan oldinda bormoqda - 6:2. 

Uch soatu to'rt daqiqa davom etgan final bahsida Medvedevga 13 ta eys (Yannikda 5 ta) zarbasi ham yordam bermadi. Daniil 8 ta (Sinnerda 0) qo'shxatoga yo'l qo'ydi. Breyklar esa bir xilda - 4 tani tashkil etdi. Uchinchi setning to'rtinchi geymi 20 daqiqa davom etgan. 

Bu italiyalik tennischining joriy mavsumdagi to'rtinchi sovrini bo'ldi. Yannik 500 reyting ochkosi bilan birga 450,650 evro mukofot pulini ham qo'lga kiritdi. Medvedev esa 300 ochko va 242,480 evro ishlab oldi.