MMA MVP turniri Rouzi va Karano sabab AQSH rekordini yangiladi

MVP va Netflix press-relizlariga ko'ra, butun dunyo bo'ylab 12,4 milliondan ortiq tomoshabin turnirni striming platformasida jonli efirda tomosha qilgan. Oqshomning asosiy voqeasi Ronda Rouzi va Jina Karano jangi paytida eng yuqori auditoriya 17 millionga yaqinlashgan. Bu esa ushbu voqeani barcha davrlarning eng ko'p tomosha qilingan MMA turnirlaridan biriga aylantirgan.

Birgina Qo'shma SHtatlarda asosiy jangni o'rtacha 9,3 million tomoshabin kuzatgan bo'lsa, asosiy jang paytidagi eng yuqori auditoriya soni 11,6 millionga etgan. Bu esa uni AQSH hududida MMA tarixidagi eng ko'p tomosha qilingan tadbirga aylantirdi.

Turnir, shuningdek, MVP ijtimoiy tarmoqlarida 410 milliondan ortiq ko'rishlar sabab 2,2 million dollardan ortiq daromad keltirdi va butun mamlakat bo'ylab barlar, restoranlar, kazinolar va ko'ngilochar muassasalarda keng tijoriy tarqalishga erishdi. 

"Biz Netflix hamkorlarimiz bilan birgalikda erishgan yutuqlarimizdan cheksiz faxrlanamiz va MVP MMA debyuti shunchalik muvaffaqiyatli bo'lishiga yordam bergan sportchilardan minnatdormiz.

Biz investorlardan, strategik hamkorlardan va kelajakdagi MVP MMAning bir qismi bo'lishni istagan jangchilardan juda ko'p so'rovlar oldik. Hozirda biz sohaga uzoq muddatli tasir ko'rsatish bo'yicha qarashlarimizni baham ko'radigan Netflix kabi distribyutor bilan hamkorlikda MMA olamida haqiqatan ham ahamiyatli bo'lgan narsani yaratish uchun barcha strategik variantlarni ko'rib chiqyapmiz", - deyiladi press-relizda.

Turnir oldidan Ronda Rouzi Netflix’da ko'rishlar to'qqiz million tomoshabindan oshib ketishga umid qilayotganini aytdi. 

Elon qilingan muvaffaqiyatga qaramay, tadbir Netflix’dagi boks shoularidan sezilarli darajada ortda qolmoqda. Xususan, Mayk Tayson va Jeyk Pol jangi 108 million tomoshabinni, Saul "Kanelo" Alvares va Terens Krouford 44 million tomoshabinni, Jeyk Pol va Entoni Joshua jangi esa 33 million Netflix obunachisini jalb qilgan.