MOQ raisi o'rinbosari, mamlakat dzyudo federaciyasi rahbari Azizjon Kamilovni tabriklaymiz!

Hech kimga sir emas, Azizjon Yakubjanovich federaciya rahbari etib tayinlanganidan so'ng mamlakatimiz dzyudosidagi islohotlar yanada jonlandi. Dzyudochilarimiz tomonidan xalqaro musobaqalarda qo'lga kiritilayotgan natijalar ham ijobiy tomonga o'zgardi. Uzoqqa bormaymiz, shu yilning o'zida dzyudochilarimiz ham Osiyo, ham jahon chempionatida muvaffaqiyatli tarzda ishtirok etishdi. Bishkekda o'tgan qita chempionatida terma jamoamiz azolari tarixda ilk bor 10 ta medal qo'lga kiritishdi. Jahon chempionatida Davdat Bobonov kumush medalga ega chiqqan bo'lsa, jamoaviy mikst bahslarida birinchi marotaba bronza medaliga sazovor bo'ldik. 

Muhtasham "Humo Arena"da ilk bor "Katta Dubulg'a" turniri yuqori saviyada tashkil etildi. Buni xalqaro ekspertlar ham etirof etishdi. Ilk bor kattalar o'rtasidagi jahon chempionati mezbonligi O'zbekistonga ishonib topshirildi. Yurtimiz ayollar dzyudosi tarixida ilk bor "Katta Dubulg'a" turniri medallari qo'lga kiritildi. Gulnoza Matniyazova bronza, Diyora Keldiyorova oltin medalni o'ziniki qilib oldi. Bu kabi muvaffaqiyatlar haqida uzoq gapirish mumkin.       

Fursatdan foydalanib, murabbiylar, dzyudochilar, umuman, katta o'zbek dzyudo oilasi nomidan Azizjon Kamilovni har bir inson hayotidagi unutilmas kun - tavallud ayyom bilan chin qalbdan muborakbod etamiz. Azizjon Yakubjanovichga sihat-salomatlik, oilaviy baxt, xotirjamlik, farzandlari rohatini ko'rib yurishlarini tilaymiz. 

Nasib qilsa, biz birgalikda yana katta yutuqlarga erishamiz. Ostonada to'rt yillikning eng nufuzli musobaqasi - Tokio Olimpiadasi turibdi. Azizjon Yakubjanovich boshchiligidagi yurtimiz dzyudochilari Olimpiya o'yinlarida xalqimiz kutayotgan natijaga erishish uchun astoydil harakat qiladi. 

Azizjon Yakubjanovich, yana bir bor tavallud ayyomingiz muborak bo'lsin!