MOQ Zagrebda muvaffaqiyatga erishgan yunon-rum kurashchilarimizni qutladi!

O'zbekiston Milliy olimpiya qo'mitasi kurashchilarimizni ushbu muvaffaqiyatli ishtirok bilan tabrikladi.

"Kuragi erga tegmas kurashchilarimiz, Sizlar 16-17 yanvar kunlari Xorvatiyaning Zagreb shahrida o'tkazilgan “Zagreb Open” musobaqasida muvaffaqiyatli ishtirok etib, mamlakatimiz sport salohiyatini butun dunyoga namoyish etdingiz.

Ortda qolgan murakkab davrda noqulay sharoitda bo'lsa ham bir zum mashg'ulotlarni to'xtatmadingiz, o'z oldingizga qo'ygan ulkan maqsad sari dadil qadam qo'ymoqdasizlar. Xorvatiya turnirida o'z irodangiz va matonatingizni namoyish qilib, 2 ta oltin, 1 ta kumush va 1 ta bronza medallarini qo'lga kiritdingiz.

O'zbekiston Milliy olimpiya qo'mitasi Sizlarni uzoq muddatli tanaffusdan so'ng yana xalqaro arenalarda erishgan shunday yutug'ingiz bilan muborakbod etadi. Oldindagi nufuzli musobaqalar, jumladan Tokio-2020 Olimpiya o'yinlarida ham ana shunday zafarlar bilan xalqimiz va Prezidentimizni xursand qilishingizga tilakdoshmiz", deyiladi tabrikda.