Murabbiylik faoliyatini boshlagan SHarofiddin Lutfullaev yana bir yoshga ulg'aydi

SHarofiddin polvonlar yurti - Surxondaryo viloyatining Angor tumanida dunyoga kelgan. U avvaliga kurash, keyin esa dzyudo bilan shug'ullana boshlagan. Bugungi qahramonimizning sportni tanlashiga mehribon onajonisi sabab bo'lgan. Murabbiyi - Bekzod To'raboev. SHarofiddinning erishgan yutuqlari va bugungi darajasiga chiqishida aynan Bekzod akaning xissasi katta. 

2019 yilning sentyabrida SHarofiddin dzyudo vatani Yaponiyada o'tgan Jahon chempionatida kumush medalni qo'lga kiritgan. Lutfullaev aynan o'sha musobaqadan so'ng Olimpiada reytingida birinchi o'ringa ko'tarilib olgan edi. SHarofiddinning yutuqlaridan yana biri 2013 yilda Abu-Dabi Gran-prisiga to'g'ri keladi. O'shanda yosh dzyudochimiz London-2012 Olimpiadasi chempioni, Rossiya terma jamoasiga 22 yillik tanaffusdan so'ng ilk oltin medalni taqdim etgan Arsen Galstyanni mag'lub eta olgandi. 

Fursatdan foydalanib, saytimiz ijodiy guruhi hamda o'quvchilari nomidan kuni kecha o'zi tug'ilib o'sgan Surxondaryoda murabbiylik faoliyatini boshlagan "Mard o'g'lon" davlat mukofoti sohibi SHarofiddin Lutfullaevni bugungi shukrona kuni bilan muborakbod etamiz. Unga sihat-salomatlik, oilaviy baxt tilaymiz. Olimpidadagi orzusi ro'yobini murabbiy sifatida tayyorlaydigan shogirdlarida ko'rish baxti nasib etsin.