Murodjon Ahmadaliev 8 aprel kungi raqibiga tarif berdi

WBA va IBF yo'nalishlari bo'yicha jahon chempioni Murodjon Ahmadaliev (11-0, 8 KO) 8 aprel kuni San-Antonio (AQSH)da IBF yo'nalishi bo'yicha majburiy raqib filippinlik Marlon Tapalesga (36-3, 19 KO) qarshi bo'lib o'tadigan jangiga tayyorgarlikni yakunlamoqda. 

"Raqibim chapaqay, tezkor, kuchli, yaxshi zarbaga ega. Ammo men ringga faqat kamarlarimni himoya qilish maqsadida chiqaman. Kim kuchliroq ekanligini faqat ring ko'rsatadi.

Bu albatta, ajoyib jang bo'ladi, chunki uslublarimiz o'xshash. Ikkalamiz ham kuchli zarbaga egamiz, ikkimiz ham oldinga boramiz. To'qnashuv ajoyib bo'lishiga ishonaman. Men o'zimning eng yaxshi jihatlarimni ko'rsatish uchun bor kuchimni sarflayman - kuchli zarba, tezlik, bokschilik aql-zakovati. Lekin hammasini ring ko'rsatadi", - dedi Ahmadaliev xorij nashriga bergan intervyusida.