Murodjon Ahmadalievga "O'zbekiston iftixori" faxriy unvoni, uy va "Treker" avtomobili topshirildi + FOTO

Bugun bokschimiz yurtimizga qaytib keldi. U Islom Karimov nomidagi Toshkent xalqaro aeroportida sport jamoatchiligi tomonidan tantanali ravishda kutib olindi. 

Kutib olish marosimida O'zbekiston Respublikasi Prezidenti maslahatchisi Abdujabbor Abduvohidov, O'zbekiston Respublikasi Bosh vazirining birinchi o'rinbosari va O'zbekiston boks federaciyasi raisi Achilbay Ramatov, Milliy olimpiya qo'mitasi prezidenti Rustam SHoabdurahmonov, O'zbekiston Respublikasi Jismoniy tarbiya va sport vaziri Dilmurod Nabiev, uning birinchi o'rinbosari Oybek Kasimov, O'zbekiston boks federaciyasi raisining birinchi o'rinbosari Saken Polatov, sportchining yaqinlari, muxlislar va OAV xodimlari ishtirok etishdi. 

Kutib olish marosimidan so'ng "Olimpiya shon-shuhrati" muzeyida bokschimizni taqdirlash marosimi tashkil etildi. Unda O'zbekiston Respublikasi Bosh vaziri Abdulla Aripov ham ishtirok etdi. Abdulla Nigmatovich tadbir davomida so'zga chiqar ekan, Ahmadalievning ushbu g'alabasi o'zbek sporti uchun ulkan yutuq ekanligi, jahon boksidagi 42 yillik rekord aynan o'zbekistonlik bokschi tomonidan takrorlangani muhim ahamiyatga ega ekanligini qayd etib o'tdi. 

SHuningdek, tadbir davomida O'zbekiston Respublikasi Prezidenti SHavkat Mirziyoevning sportchimizga «O'zbekiston iftixori» faxriy unvonini berish to'g'risidagi farmoni o'qib eshittirildi. So'ngra, Bosh vazir Abdulla Aripov Prezident sovg'asi sifatida Toshkent shahridan 3 xonali uy va "Treker" avtomobilining kalitini bokschimizga topshirdi. 

O'zbekiston boks federaciyasi matbuot xizmati