24 avg 14:37
Yangiliklar

Boks/MMA

Mustaqil O'zbekiston bokschilari Osiyo o'yinlarida (natijalar va barcha sovrindorlarimiz)

Yaqinlashib kelayotgan Mustaqillik bayrami munosabati bilan o'zbekistonlik bokschilarning Osiyo o'yinlaridagi ishtirokiga oid malumotlarni etiboringizga havola qilmoqchimiz.

Vatanimiz mustaqillikka erishganidan so'ng ilk marotaba 1994 yilda terma jamoa sifatida Xirosimadagi Osiyo o'yinlarida ishtirok etgan.

O'sha musobaqada charm qo'lqop ustalarimiz 4 ta medal (2 ta oltin va 2 ta bronza) qo'lga kiritishgan:

Oltin: Alisher Avezbaev, Oleg Maskaev

Bronza: Nariman Ataev, Dilshod Yorbekov

O'zbek bokschilari o'sha Osiyo o'yinlarida umumjamoa hisobida to'rtinchi o'rinni egallashgan.

1998 yilda Bangkok mezbonlik qilgan Osiyo Olimpiadasi 4 yil oldingiga nisbatan muvaffaqiyatli kechgan. Bokschilarimiz umumiy hisobda 9 ta (3 ta oltin, 4 ta kumush va 2 ta bronza) medallariga ega chiqishgan.

Oltin: Muhammadqodir Abdullaev, Sergey Mixaylov, Ruslan CHagaev

Kumush: Timur Tulyakov, To'lqinboy Turg'unov, Timur Suleymanov, Dilshod Yorbekov

Bronza: Narimon Ataev, Lazizbek Zokirov

Vakillarimiz o'shanda 9 ta medal qo'lga kiritib medallar soni bo'yicha birinchi bo'lishgan. Medallar sifati bo'yicha esa mezbonlardan so'ng ikkinchi o'rinni egallaganmiz.

2002 yili Pusan mezbonlik qilgan Osiyo o'yinlarida O'zbekiston gegemoniyasi boshlangan. Bahslarda vakillarimiz 9 ta medal (5 ta oltin, 1 ta kumush va 3 ta bronza) qo'lga kiritganlar.

Oltin: Dilshod Mahmudov, O'tkirbek Haydarov, Ikrom Berdiev, Sergey Mixaylov, Rustam Saidov

Kumush: Bekzod Xidirov

Bronza: Baxit Sarsekbaev, SHerzod Husanov, Sirojiddin Naimov

Terma jamoamiz Janubiy Koreya mezbonlik qilgan Osiyo o'yinlarida medallar sifati bo'yicha umumjamoa hisobida birinchi o'rinni egallagan.

Qitadagi etakchilik 2006 yilgi Osiyo o'yinlarida ham davom ettiriladi. Vakillarimiz Doha mezbonlik qilgan musobaqadan 6 ta (3 ta oltin, 1 ta kumush va 2 ta bronza) medali bilan qaytishgan.

Oltin: Bahodirjon Sultonov, Elshod Rasulov, Rustam Saidov

Kumush: Jasur Matchanov

Bronza: Bekzod Xidirov, Dilshod Mahmudov

Bokschilarimiz 6 ta medalni terma jamoamiz delegaciyasiga qo'shib qo'yishgan va umumjamoa hisobida birinchi bo'lganlar.

2010 yilgi Guanchjou mezbonlik qilgan Osiyo Olimpiadasidan vakillarimiz 5 ta medal (1 ta oltin, 2 ta kumush va 2 ta bronza) bilan qaytishgan.

Oltin: Elshod Rasulov

Kumush: O'ktamjon Rahmonov, Abbos Atoev

Bronza: Xurshid Tojiboev, Sanjarbek Rahmonov

O'sha yili bokschilarimiz umumjamoa hisobida to'rtinchi pog'onadan o'rin egallashgan edi.

2014 yili Incheon mezbonlik qilgan Osiyo o'yinlari o'zbekistonlik bokschilar uchun eng muvaffaqiyatsizi deb hisoblasak bo'ladi. Umuman olganda, o'sha Osiyo o'yinlari ikki yildan keyin o'tkaziladigan Rio Olimpiadasi uchun «qurbon qilingan» desak adashmaymiz. Vakillarimiz 2014 yili Janubiy Koreyadagi Osiyo o'yinlaridan 2 ta kumush va 2 ta bronza bilan qaytganlar.

Kumush: SHahobiddin Zoirov, Isroil Madrimov

Bronza: Oybek Mamazulunov, Mirzohid Abdullaev

O'sha Osiyo o'yinlarida bokschilarimiz umumjamoa hisobida 8-o'rinni egallashgan.

2018 yilgi Osiyo o'yinlari esa nafaqat o'zbek boksi, balki butun boshli o'zbek sporti tarixida o'ziga xos iz qoldirgan. O'sha yili Indoneziyada o'tkazilgan Osiyo o'yinlarida bokschilarimiz 7 ta vazn toifasida 7 ta medal (5 ta oltin, 2 ta kumush) medallariga ega chiqqanlar. Etibor bergan bo'lsangiz, har bir vazn toifasida o'zbek bokschilari finalga qadar etib borganlar.

Oltin: Jasurbek Latipov, Mirazizbek Mirzahalilov, Iqboljon Xoldorov, Bobousmon Baturov, Isroil Madrimov

Kumush: Hasanboy Do'smatov, SHunqor Abdurasulov

Bokschilarimiz Jakartadagi Osiyo o'yinlarida umumjamoa hisobida birinchi o'rinni egallashgan.