Namanganda erkin kurash bo'yicha xalqaro turnir o'tkazildi

Mamlakatimizda aholi, ayniqsa yoshlarni sportga faol jalb qilish, iqtidorli sportchilarni qo'llab-quvvatlash, chekka hududlarda yashovchi yoshlarning ham sport bilan shug'ullanishi uchun imkoniyat yaratish masalalari davlatimiz va hukumatimizning doimiy etiborida desak mubolag'a bo'lmaydi.

Jumladan, Namangan viloyatida ham yoshlarni jismoniy tarbiya va sport bilan shug'ullanishlari uchun keng imkoniyatlar yaratilmoqda. Buning natijasida ko'plab jahon va Osiyo chempionlari etishib chiqmoqda.

Jismoniy tarbiya va sport vazirligi, viloyat jismoniy tarbiya va sport boshqarmasi, sport kurashlari associaciyasi viloyat bo'limi hamda Namangan Olimpiya zaxiralari kolleji hamkorligida Namangan Olimpiya zaxiralari kollejida erkin kurash bo'yicha viloyat ochiq birinchiligi bo'lib o'tdi. Ushbu musobaqada qo'shni qirg'izistonlik sportchilar bilan birgalikda respublikamizning 9 ta viloyati hamda mezbon jamoa namanganliklar g'oliblik yo'lida bahs olib borishdi.

Mazkur turnirda 2003-2005 va 2006-2008 yillarda tug'ilgan o'smirlar hamda undan kichik yoshdagi 750 nafardan ziyod sportchilar 18 ta vaznda gilamga chiqishdi. Qizg'in va murosasiz kechgan bahslar yakuniga ko'ra g'olib va sovrindorlar tashkilotchilar tomonidan diplom, medal va esdalik sovg'alari bilan taqdirlanishdi.