Namanganda "Velosipedda sayr kuni" o'tkazildi

SHahar va barcha tumanlaridagi o'yingoh va xiyobonlar sog'lom turmush tarzi targ'iboti markaziga aylandi. Jumladan, Namangan xalqaro aeroportiga eltuvchi keng va ravon yo'l ertalabdanoq etti yoshdan etmish yoshgacha sog'liqni saqlash, xalq talimi, maktabgacha talim xodimlari, jamoat tashkilotlari va yoshlar vakillaridan iborat yuzlab havaskor velosportchilar bilan gavjum bo'ldi. 

– Yoshi ulug'lar bardamligi va tetikligini taminlashda velosportning ahamiyati katta, – deydi “Nuroniy” jamg'armasi qoshidagi sport to'garagi azosi Abbosxon ota Nasriddinov. – Uzoq umr ko'raman, sog'lom va baquvvat bo'laman degan otaxon va onaxonlarimiz velosipedda sayr qilishni muntazam yo'lga qo'yishlari lozim. 

Qiziqarli ommaviy tadbir bosqichma-bosqich amalga oshirildi. Dastlab keksa avlod vakillari, keyin esa velosipedchi xotin-qizlarga start berildi. Ayniqsa, son jihatdan ko'proq bo'lgani uchun erkaklar o'rtasidagi musobaqa qizg'in kechdi. 

Musobaqalarga viloyat velosportchilar jamoasi vakillari hakamlik qildi. 

– “Velosipedda sayr kuni” sog'lom turmush tarzini targ'ib qilishga qaratilgan boshqa turli ko'ngilochar tadbirlarni ham qamrab oldi, – deydi viloyat sog'liqni saqlash boshqarmasi boshlig'ining manaviy-marifiy ishlar bo'yicha o'rinbosari A.G'oziev. – Ayniqsa, “Salomatlik maydonchalari” va “Sog'lom ovqatlanish yarmarkalari”dagi ko'rgazmalar, mutaxassislar tomonidan olib borilgan “Sog'lom turmush tarzi asoslari” va “Jismoniy faollikning inson organizmiga tasiri” mavzularidagi suhbatlar barchaga manzur bo'ldi. 

Tadbir yakuni bo'yicha eng faol keksa ishtirokchilar, eng yosh qatnashchilar, erkaklar va ayollar o'rtasida alohida mahorat ko'rsatgan velosipedchilar viloyat sog'liqni saqlash boshqarmasining diplom va homiylarning esdalik sovg'alari bilan taqdirlandi.