Navoiyda kurash bo'yicha O'zbekiston kubogi musobaqalari bo'lib o'tdi

O'zbekiston kurash federaciyasi, viloyat hokimligi hamkorligida tashkil etilgan musobaqada Qoraqalpog'iston Respublikasi, viloyatlar va Toshkent shahridan 260 ga yaqin sportchi 16 vazn toifasida gilamga chiqdi. 

O'g'il bolalar o'rtasidagi musobaqalarda mezbon sportchilar SHahzod Qodirov, SHerdor Toshbotirov, SHahboz Komilov, Samarqand viloyatidan Jonibek Qozoqov, Islomjon Karimov, Andijon viloyatidan Oybek Usmonov, Buxorodan Mahmado'st Mahmaniyozov, Qashqadaryodan SHerbek Abloqulov, Surxondaryo viloyatidan Azamjon Maqsudaliev o'z vazn toifasida raqiblaridan ustun keldi. Qizlar o'rtasidagi bellashuvlarda Navoiy viloyati vakilasi Marjona Boboqandova, Dilnoza Kamolova, Surxondaryodan Mohinur Mo'minova, Andijon viloyatidan Oysuluv Abdumajidova, Toshkent shahridan Kumush Xo'jaeva, Farg'ona viloyati sharafini himoya qilgan Mohinur Pirnazarova, Xorazm viloyati sportchisi Nasiba Yo'ldoshevaning qo'li baland keldi. 

Musobaqada mezbon jamoa sportchilari 14 medal jamg'argan holda g'oliblikni qo'lga kiritdi. Ikkinchi va uchinchi o'rinlar Surxondaryo hamda Samarqand viloyatlari kurashchilariga nasib etdi.