Nemkov - Romero jangi nomalum muddatga qoldirildi

Yarim og'ir vazn toifasida Bellator chempioni, rossiyalik Vadim Nemkov hamda kubalik Yoel Romero o'rtasida 4 fevral kuni Bellator 290 turniri doirasida o'tkazilishi kutilgan jang nomalum muddatga qoldirildi.

Avvalroq, Nemkovning o'zi ham jangni boshqa sanaga ko'chirishni rahbariyatdan so'rashini malum qilgan edi. U fevral oyigacha tiklana olmasligini qo'shimcha qilib o'tgandi.

Vadim Nemkov o'zining so'nggi jangini shu yilning noyabr oyida Bellator 288 musobaqasi doirasida amerikalik Kori Andersonga qarshi o'tkazdi. Ushbu qarama-qarshilikda Vadim hakamlarning yakdil qarori bilan g'alaba qozondi. Uning hisobida ayni damda 15 g'alaba va 2 mag'lubiyat bor.

Romero so'nggi bor shu yilning sentyabr oyida Bellator 285 musobaqasida niderlandiyalik Melvin Manxoefga qarshi jang o'tkazgan. Mazkur jang Yoelning foydasiga uchinchi raundda nokaut bilan yakunlangan edi. Romeroning hisobida 15 ta g'alaba va 6 ta mag'lubiyat mavjud.