Nigina Abduraimova Svitolina qatnashayotgan turnirdagi ishtirokini g'alaba bilan boshladi

Xabar berganimizdek, ushbu musobaqada hamyurtimiz Nigina Abduraimova ham ishtirok etyapti. Mamlakatimizning birinchi raketkasi turnirning ilk davrasida germaniyalik Mona Bartelga qarshi bahs olib bordi. Etmish olti daqiqa davom etgan uchrashuvda hamyurtimiz 6/3, 6/4 hisobida zafar quchdi. 

Taqqoslash uchun, Abduraimova WTA reytingida 186, Bartel esa 201-o'rinni egallab turibdi. Tennischilarning o'zaro uchrashuvida Abduraimova hisobni tenglashtirdi - 1:1. Turnirda sakkizinchi raqam ostida tasniflangan tennischimizning ikkinchi davradagi raqibasi bugun o'tkaziladigan Alise Tubello (Franciya) - Darya Semenistaya (Latviya) uchrashuvidan so'ng aniqlanadi. 

Darvoqe, SHveycariyadagi ushbu turnirda deyarli ikki yillik tanaffusdan so'ng katta tennisga qaytgan ukrainalik Elina Svitolina ham ishtirok etyapti. Tashkilotchilar WTA reytingida 1344-pog'onada borayotgan Svitolinaga asosiy to'rda to'g'ridan-to'g'ri qatnashish huquqini beruvchi vayld-kard, yani imtiyozli yo'llanma taqdim etishgan. Elina bugun birinchi davrada dunyoning 160-raketkasi, ruminiyalik Elena Gabriela Ryusga qarshi kortga chiqadi.