Nigora Tursunqulova: "Xatto bronza medali ham osonlikcha qo'lga kiritilmaydi"

Ushbu musobaqada ishtirok etgan o'zbekistonlik taekvondochi Nigora Tursunqulova -67 kg vazn toifasida bronza medaliga ega chiqdi. SHu munosabat bilan O'zbekiston taekvondo WT associaciyasi matbuot xizmati sportchimiz bilan suhbatlashdi. 

- Xitoyning Usi shahrida bo'lib o'tgan Katta Dubulg'a musobaqasiga saralash bahslarida bronza medaliga ega bo'ldingi. Taassurotlar qanday? 

- Usida o'tgan Katta Dubulg'a musobaqasiga saralash bahslari yaxshi o'tdi. Unda bronza medali bilan birgalikda musobaqaning final bosqichiga yo'llanmani qo'lga kiritganimdan xursandman. Anchadan buyon ushbu musobaqada qatnashishni xohlardim. CHunki bu yo'llanma kuchli va tajribali chempionlar bilan yana jang o'tkazishga imkoniyat yaratib beradi. U erda TOP-5dagi taekvondochilar ham ishtirok etishadi. Ularga qarshi dayanga chiqish orqali tajribamni yanada oshirib olaman degan umiddaman. 

- Qisqa muddatda ikkita musobaqada qatnashib ikkita medalga ega chiqdingiz. Qaysi musobaqa shaxsan siz uchun qiyinroq o'tdi? 

- Uxan shahrida o'tgan Butunjahon armiya o'yinlarida kumush, Usida esa bronza medaliga ega chiqdim. Hech bir medal osonlikcha qo'lga kiritilmaydi. CHunki Uxandagi musobaqada shu yilgi Jahon chempioni xitoylik Zang Mengyu, Jahon chempionati bronza medali sohibasi braziliyalik Milena Titoneli va boshqa kuchli taekvondochilar ishtirok etishdi. Usidagi saralashda esa yuqoridagi sportchilar bilan bir qatorda koreyalik Kim Jan Di va ivuarlik Rut Gbagbi kabi sovrindor taekvondochilar qatnashishdi. SHunday bo'lsa ham Xudoga shukurki 3-o'rinni egalladim. Bu natijaga erishishimda murabbiylarimning xizmati beqiyos bo'ldi. Ularga va terma jamoadagi qolgan taekvondochilarga minnatdorchilik bildiraman. 

- Aytganimizdek dastlab Uxanda, so'ngra Usida nufuzli musobaqalarda ishtirok etingiz. Qisqa vaqtda ikkita musobaqada qatnashish qanchalik qiyin bo'ldi? 

- Biz ikkita emas ketma-ket uchta yirik musobaqada ishtirok etdik-ku (kuladi). Dastlab Sofiyada bo'lib o'tgan Gran-pri, ikkinchisi Uxandagi Butanjahon armiya o'yinlari hamda Usidagi saralash bahslari. Albatta bunday tig'iz taqvimda istalgan sportchida charchoq alomatlari va kichik jarohatlar bo'ladi.  Lekin shukurki imkon qadar yaxshi natijalar qayd eta oldik. To'g'risini aytsam yurtimizni juda ham sog'indim. 

- Endigi rejalar qanday? 

- Dekabr oyi boshida Moskva shahrida 2019 yilgi Jahon Gran-prisi final musobaqasi bo'lib o'tadi. Hozir mana shu musobaqaga tayyorgarlikni boshlaymiz. Undan keyin esa 18-20 dekabr kunlari yana Usi shahrida Katta Dubulg'a musobaqasi final bosqichida ishtirok etaman.