Nima uchun erkin kurash MMAning asosi hisoblanadi?

Fikrlar turfa xil. Har kim o'z fikrida qatiy turib olib, o'zini haq deb biladi. Bahs to'xtamaydi. Masalan, miks-fayt uchun eng yaxshi baza bu jiu-jitsu (Braziliyaniki) yoki muaytay deb bilishadi. Lekin baribir deyarli barcha MMA yulduzlari faoliyatlarining ilk qismida erkin kurash bilan shug'ullanishgan. 

Ular qatoriga Keyn Velaskez, Daniel Korme, Brok Lesnar, CHak Lidell, Den Xenderson, Frenki Edgar, Joni Xendriks, Rendi Kutyur, Rashad Evans, Jon Fitch, Josh Koshchek va boshqa yulduzlarni qo'shish mumkin. Ayni paytda UFCning 10 ta vazn chempionidan 7 nafari MMAga aynan erkin kurashdan kelgan. SHundan kelib chiqib ham MMAning poydevori, bazasi erkin kurash deyish to'g'ri bo'ladi.  

Xo'sh, kurashchilarning ustunligida nimada? 

1. Jismoniy kuch. Erkin kurashda sportchilar kuchaytirilgan va kuchga yo'naltirilgan mashg'ulotlarda toblanishadi. SHu sababdan ham ular besh raundlik MMA janglarida charchoq nimaligini bilishmaydi, raqib bosimiga turib bera olishadi. MMAga erkin kurashdan o'tgan sportchilar boshqa yakkakurash vakillariga qaraganda ustunlikka ega bo'lishadi. Keyin erkin kurashchilarda chidamlilik sifati yuqori.

2. Odatda kurashchilar nokautbop zarba kuchiga ega bo'lishadi. Biroz g'alati tuyulishi mumkin, lekin bokschilarga qaraganda erkin kurashchilarni kurashishga va aniq kuchga yo'naltirilgan zarbani berishga o'rgatish osonroq. Bunga yorqin misol - Den Xenderson bo'lib, u SHeyn Karvinni o'zining afsonaviy o'ng tomondan beradigan kuchli zarbasi evaziga nokautga uchratgan edi. 

3. Kurashni o'zlashtirish qiyin. Mashg'ulotlarga hamma ham dosh bera olmaydi. O'zida kurash yoki greppling (sambo, jiu-jitsu, dzyudo va boshqalar)ni mujassam etmagan jangchilarga oson bo'lmaydi. 

4. Kurashchi tik holatda jangni davom ettirish kerakmi yoki parterda, buni o'zi tanlaydi. Agar tajribali kurashchi tik turgan holatdagi bellashuvni tanlasa, shunday bo'ladi. Lekin u tik holatdagi jangda yutqazishni boshlasa, o'sha zahoti bellashuvni parterga ko'chirishi mumkin. 

5. Kurashda asosiy rolni mehnat etikasi tashkil qiladi. Yoshlar kurash bilan shug'ullanishni boshlaganlaridayoq haqiqiy parhez, intizom va mashaqqatli mashg'ulotlarga o'rganadi. Kurashchilar - ko'p mehnat qiladigan insonlar toifasiga mansub bo'lib, ularning jismoniy taraflama ustunligi aynan shunda bo'lsa kerak.

Endi bu mavzuda uzoq bahslashish mumkin. Bahsga kirishgan har bir inson o'zi shug'ullangan yakkakurash turidan kelib chiqib, o'z fikrini maqullaydi.