Nursultonni xafa qilgan UFC jangchisi SHavkat Rahmonovga "vyzov" tashladi

UFC yarim o'rta divizionining ettinchi raqamli jangchisi Xoakin Bakli SHavkat "Nomad" Rahmonovga qarshi oktagonga chiqish istagini bildirdi.

"SHavkat Rahmonov, fevral oyi boshida qaytmoqchiman dedingmi? Unday bo'lsa, Bokuga kel. CHunki sen doim: "Bak - oson ish. U oddiy o'lja" der eding. O'zingni butun dunyoga ko'rsat, chunki seni anchadan beri hech kim ko'rgani yo'q, uka. Biz seni kutamiz. Bu men va SHavkat uchun ajoyib jang bo'ladi deb o'ylayman. SHavkatni nokautga uchratganimdan keyin esa chempionlik jangi haqida qayg'uraman", - dedi Bakli YouTube’dagi kanalida elon qilingan videoda.

Malumot uchun, SHavkat Rahmonov so'nggi jangini o'tgan yilning dekabr oyida o'tkazib, davogarlar bahsida Yan Machado Garrini hakamlarning yakdil qarori bilan mag'lubiyatga uchratgandi. Ammo keyin tizzasidagi jarohat sabab chempionlik jangidan mahrum bo'lgan. SHavkatning imkoniyatidan Jek Della Maddalena foydalanib ketgandi. Qozog'istonlik jangchining menejeri Sayat Abdraxmanov yaqinda bergan intervyusida uning shogirdi yanvar oyining oxiri yoki fevral oyining boshida qaytishni rejalashtirayotgani va divizionning eng yaxshilaridan biri bilan davogarlik jangini o'tkazishga tayyorligini malum qilgandi.

Xoakin Bakli esa iyun oyida oltita g'alabadan iborat seriyasini to'xtatib, besh raund yakuniga ko'ra hakamlarning yakdil qarori bilan Kamaru Usmanga yutqazgan edi.