“Olimpiya kuni” 2.5 million hamyurtimizni birlashtirdi

Ahamiyat bering, Respublikamiz tarixida hali bunday katta masshtabdagi sport tadbiri o'tkazilmagan.

Tadbir 6 iyul sanasiga belgilangan bo'lsa-da, mazkur bayramni nishonlash Respublikamiz viloyatlarida bir necha kun muqaddam boshlanib ketgan edi. Jumladan, dastlab Buxoro viloyati Ark qo'rg'onida “Olimpiya kuni” doirasida 10 ming kishi ishtirokida ommaviy sport tadbiri o'tkazildi.

SHundan so'ng “estafeta tayoqchasi” Samarqand, Xorazm, Andijon, Qashqadaryo va boshqa viloyatlariga navbati bilan o'tib bordi.

Mazkur sport tadbiri Toshkentdan Termizgacha, Xonabod shahridan Qoraqalpog'istonning chekka hududlarigacha bo'lgan joydagi deyarli har bir oilaga kirib bordi. SHu bois ham ortda qolgan haftani Olimpiya va sport haftaligi sifatida tarixda qoldi, deya bemalol ayta olamiz. Zero, bir necha kun mobaynida har bir viloyat, shahar va tuman markazlarida Olimpizm g'oyalarini, sog'lom turmush tarzini targ'ib qilish bo'yicha katta hajmdagi ishlar amalga oshirildi. Takidlash joiz, ushbu tadbir doirasida yirik sanoat korxonalaridan tortib yozgi bolalar oromgohlari, mamlakatimizda faoliyat olib borayotgan ko'plab tashkilotlar ham faol ishtirok etishdi. Hisob-kitoblarga ko'ra, bu yilgi “Olimpiya kuni” butun Respublikamiz bo'ylab 2.5 million kishini sport targ'iboti, Olimpizm g'oyasi yo'lida birlashtirdi.

Jumladan, Toshkentda o'tgan ommaviy sport tadbiri ham poytaxtimiz aholisi uchun chinakam bayramga aylandi. Bog'lardagi ko'ngilochar tadbirlar, markaziy xiyobondagi otlar paradi, “Humo arena”dagi koncert minglab hamshaharlarimizga olam-olam quvonch ulashdi.

6 iyul kuni “Humo arena”da o'tgan katta koncert dasturi esa mamlakatimizda o'tgan Olimpiya va sport haftaligining mantiqiy yakuni bo'ldi. O'zbekiston Milliy olimpiya qo'mitasi bundan keyin ham ommaviy sport targ'iboti yo'lida qator sport tadbirlarini tashkil etishda davom etadi. Rejaga ko'ra, hamyurtlarimiz uchun istirohat bog'larida turli musobaqalar, sportimiz yulduzlari ishtirokida mahorat saboqlari, ko'rgazmali chiqishlar tashkil qilish dasturga kiritilgan.