Osiyo chempionati. Finalda Abdullaev - Kumar bahsi bo'lmaydi. Uch kurashchimiz bronza uchun kurashadi

Biroz avval qita chempionatining beshinchi kungi saralash bellashuvlari yakunlanib, kechki dasturda medallar uchun gilamga chiqadigan juftliklar malum bo'ldi. 

Afsuski, bugun kumush yoki oltin medal bo'lmaydi. Erkin kurashchilarimizdan uch nafari kechki dasturda bronza medali uchun gilamga chiqishadi. Kamida finalga chiqishini kutganimiz G'ulomjon Abdullaev chorak finalda qozog'istonlik Rahat Kaljanga 1-6 hisobida imkoniyatni boy berib qo'ydi. 

Tokio Olimpiadasi ishtirokchisi hisoblangan Abdullaev o'tish uchrashuvida shri-lankalik Gayan Mudiyanselagedan 4-0 hisobida ustun keldi. Endi u bronza medali uchun qirg'izistonlik Almaz Smanbekovga qarshi bahs olib boradi. Finalda Ravi Kumar (Hindiston) - Rahat Kaljan (Qozog'iston) bahsiga guvoh bo'lamiz. 

Bronza uchun gilamga chiqadigan kurashchilarimiz:

-57 kg: G'ulomjon Abdullaev - Almaz Smanbekov (Qirg'iziston) 

-65 kg: Abbos Rahmonov - Haji Muhammad Ali (Bahrayn)

-97 kg: Muhammadrasul Rahimov - Mamed Ibragimov (Qozog'iston)

Erkin kurashchilarimizdan Begijon Qo'ldoshev (-70 kg) ilk davrada koreyalik Yonseok Jeongga 5-6, Jasurbek Usmonoxunov (-79 kg) esa boshqa bir koreys kurashchisi Bumgeo Seoga 4-5 hisobida yutqazib qo'ydi.