Osiyo chempionati. "Klassiklarimiz" birinchi kunni 2 ta oltin, 2 ta kumush medal bilan yakunlashdi

Quvonarlisi, bugungi bellashuvlarda ishtirok etgan 4 nafar yunon-rum kurashchimizning bari medallarga ega chiqdi. Ulardan birinchilardan bo'lib SHermuhammad SHaribjonov Osiyo chempionligini rasmiylashtirib oldi. 60 kg vazndagi yunon-rum kurashchimiz oltin medal uchun kechgan bahsda qirg'izistonlik Nurmuhammet Abdullaevni 9-0 hisobida dog'da qoldirdi.

Osiyo chempionligi uchun asosiy davogar hisoblanayotgan yurtdoshimiz Abror Atabaev bu taxminlarni amalda oqladi. Yaqindagina Qozog'istonda o'tgan kattalar o'rtasidagi nufuzli reyting turniri g'olibi bo'lgan Atabaev endi yoshlar orasida Osiyo chempioniga aylandi. U final uchrashuvida qirg'izistonlik Azamat Samatni 10-0 hisobida dog'da qoldirdi va O'zbekiston terma jamoasiga ikkinchi oltin medalni taqdim etdi.  

72 kg vaznda yurtimiz sharafini himoya qilgan Jahongir Hamroev Osiyo chempionatining kumush medaliga sazovor bo'ldi. Hamyurtimiz Osiyo chempionligi uchun kechgan murosasiz bahsda qirg'izistonlik Adilxan Nurlanbekovga 2-4 hisobida yutqazib qo'ydi. 

77 kg vaznda yurtimiz sharafini himoya qilgan Dilshod Omongeldiev final uchrashuvida qirg'izistonlik Akilbek Talantbekovga imkoniyatni boy (0-9) berib, Osiyo chempionatining kumush medaliga sazovor bo'ldi. 

SHu tariqa, yunon-rum kurashchilarimiz birinchi kungi bellashuvlarni 2 ta oltin, 2 ta kumush medali bilan yakunlashdi. Ertaga qolgan vazn toifalarida medallar uchun bellashuvlar davom ettiriladi.