Osiyo chempionati. To'rt nafar erkin kurashchimiz finalda, yana biri bronza uchun kurashadi

Bugun erkin kurash bahslarida ishtirok etayotgan sportchilarimizning barchasida medal qo'lga kiritish uchun imkoniyat saqlanib turibdi. Ularning to'rt nafari oltin medal uchun, yana biri esa bronza medali uchun gilamga chiqadi.

-57 kg vazn toifasida bahslarda ishtirok etayotgan Mahmudjon SHavkatov Xitoy Taypeyi, Qozog'iston va Eron mamlakatlaridan tashrif buyurgan sportchilarni mag'lubiyatga uchratdi. Endi u oltin medal uchun shimoliy koreyalik Kum Song Kangga qarshi kurash olib boradi.

-70kg vazn toifasida yurtimiz sharafini himoya qilayotgan Ixtiyor Navro'zov esa hindistonlik va qirg'izistonlik raqiblardan ustun kelib, final yo'llanmasini qo'lga kiritdi. Endi u hal qiluvchi jangda Janubiy Koreya vakili Seung Bong Liga qarshi gilamga chiqadi.

-79kg vaznda Osiyo chempionatida ishtirok etayotgan Rashid Qurbonov esa finalga etib kelish uchun Janubiy Koreya, Turkmaniston va Yaponiya sportchilarini mag'lub etdi. Endi u Osiyo chempioni bo'lish uchun eronlik Izzatilloh Akbarizorinkolaini mag'lub etishi lozim.

-97kg vaznli Magomed Ibragimov bahslarda Turkmaniston, Qirg'iziston va Yaponiyadan tashrif buyurgan raqiblarni mag'lub etdi. Finalda esa sportchimiz eronlik Muhammadshafoi Gulihga qarshi kurashadi.

-65 kg vazn toifasida bahslarda qatnashayotgan Temurjon Usmonohunov xitoylik va janubiy koreyalik raqibni mag'lubiyatga uchratgandi. Afsuski, yarim finalda u qozog'istonlik kurashchiga yutqazib qo'ydi. SHunday bo'lsada, unda sovrindorlar qatoridan o'rin olish uchun imkoniyat etarli. Vakilimiz SHimoliy Koreya vakili Kukg Vang Kimni mag'lub eta olsa, bronza medali sohibiga aylanadi.