Osiyo Kubogining tantanali ochilish marosimi yorqin lahzalarga boy bo'ldi FOTOGALEREYA

O'smirlar va yoshlar o'rtasida tashkil etilayotgan ushbu musobaqaning bugun tantanali ochilish marosimi o'tkazildi. Muxlislar bilan to'lgan "Universal" sport saroyidagi ushbu tadbirda Sportni rivojlantirish vaziri Adham Ikramov, MOQ Bosh kotibi Oybek Kasimov, Qo'mita raisi o'rinbosari, mamlakat dzyudo federaciyasi raisi Azizjon Kamilov, MOQ raisi o'rinbosari SHerzod Tashmatov, Xalqaro dzyudo federaciyasi (IJF) Bosh referi direktori Armen Bagdasarov hamda o'zbek dzyudosining qator nomdor vakillari hozir bo'lishdi. Tadbirni Azizjon Kamilov tabrik so'zi bilan ochib berdi.

"1995 yildan beri o'tkazib kelinayotgan ushbu musobaqaning yosh dzyudochilar faoliyati va hayotida tutgan o'rni beqiyos. Kattalar terma jamoasiga yo'l aynan shu kabi musobaqalardan boshlanadi. Turli yillarda Eldos Smetov, Asxat Jitkeev, Maksim Rakov (barchasi Qozog'iston), Yuriy Krakoveckiy (Qirg'iziston), Rishod Sobirov, Abdulla Tangriev, Ramziddin Saidov, Davlat Bobonov singari Olimpiada hamda jahon chempionati g'olib va sovrindorlari aynan Uchqun Murodov turnirida ishtirok etishgan. Bu yilgi musobaqada qatnashayotgan yosh dzyudochilar orasidan ham yillar o'tib Olimpiada shohsupasiga ko'tariladigan sportchilar etishib chiqishiga ishonaman", - dedi A.Kamilov.     

Ochilish marosimining badiiy qismida "Navro'z" ashula va raqs ansamblining chiqishlari, Kamol Murodov va O'lmas Gulliev shogirdlarining tatamidagi harakatlari arenaga yig'ilganlarga ko'tarinki ruh bag'ishladi.