O'tgan yilgi Dyusseldorf turniridagi ishtirokimiz qanday bo'lgandi?

Xabar berganimizdek, ushbu musobaqasida dunyoning 120 davlatidan jami 718 dzyudochi, ular qatorida 15 nafar o'zbekistonlik sportchi turnir medallari hamda Tokio-2020 Olimpiadasi yo'lidagi muhim reyting ochkolari uchun tatamiga chiqadi. 

SHu o'rinda O'zbekiston terma jamoasining o'tgan yilgi Dyusseldorf "Katta Dubulg'a" turniridagi ishtiroki haqida malumot beramiz. 22-24 fevral kunlari oralig'ida o'tkazilgan Düsseldorf Grand Slam 2019 turnirida kurrai zaminimizning 98 davlatidan jami 721 dzyudochi, ular qatorida Farhod To'raev bosh murabbiyligidagi 10 nafar o'zbekistonlik polvonlar ham ishtirok etgan edi. 

Afsuski, o'shanda Dyusseldorf tatamilari dzyudochilarimiz uchun omad keltirmagandi. Rio-2016 Olimpiadasi sovrindori, Osiyo o'yinlari g'olibi Diyorbek O'razboev (-60 kg) bronza medali yo'lidagi o'tish bahsida koreyalik Xarim Liga imkoniyatni boy bergan va ishtirokini 7-o'rinda yakunlagandi. -66 kg vazn toifasidagi vakilimiz Artyom SHturbabin o'zining uchinchi uchrashuvida boshqa bir koreyalik dzyudochi Kim Lim Xvanga yutqazib qo'ygan edi. -73 kg vazndagi G'iyosjon Boboev uchinchi bellashuvida germaniyalik Antoni Zingdan engilgandi. 

Kamoliddin Rasulov (-81 kg) ilk davrada germaniyalik Niklas Bloechlga, Davlat Bobonov (-90 kg) uchinchi bosqichda serbiyalik Aleksandr Kukoljga, Muhammadkarim Xurramov (-100 kg) ikkinchi bellashuvida niderlandiyalik Yelle Snippega yutqazib qo'ygandi. 

-100 kg vaznda yurtimiz sharafini himoya qilgan ikkinchi vakilimiz SHerali Jo'raev esa ilk davrada qozog'istonlik Viktor Demyanenkoga yutqazgan edi. +100 kg vaznda tatamiga chiqqan Bekmurod Oltiboev chorak finalda yaponiyalik Yusey Ogavadan, bronza yo'lidagi o'tish bahsida esa avstriyalik Stefan Xegyidan engilgandi. O'smirlar o'rtasida jahon chempioni bo'lgan Diyora Keldiyorova (-52 kg) birinchi davrada germaniyalik Natali Rouvierega, Nodira Yo'ldosheva (-78 kg) esa portugaliyalik Patrisia Sampayoga imkoniyatni boy berib, turnirdagi ishtirokini to'xtatgandi.

SHu tariqa, O'zbekiston terma jamoasining Dyusseldorf-2019 turniridagi eng yaxshi natijasi 7-o'rin bo'lgan edi. Diyorboek O'razboev va Bekmurod Oltiboev kuchli ettilikdan joy olgandi.  

O'ylaymizki, ertadan boshlanadigan Düsseldorf Grand Slam 2020 turnirida bir emas, bir necha dzyudochimiz shoxsupaga ko'tariladi.