24 may 19:23
Yangiliklar

Taekvondo, Olimpiya o'yinlari

O'zbek taekvondosida yangi sahifa ochgan qahramonlarimiz tantanali kutib olindi FOTO + VIDEO

21-22 may kunlari Iordaniyaning Amman shahrida taekvondo WT bo'yicha Tokio-2020 Olimpiya o'yinlariga yo'llanma beruvchi licenzion musobaqa bo'lib o'tdi.

Unda terma jamoamiz berilgan imkoniyatdan maksimal foydalanib, delegaciyamiz hisobiga 3 ta yo'llanmani taqdim qildi.

Bugun licenzion turnirda muvaffaqiyatli ishtirok etgan terma jamoamiz Toshkentga qaytib keldi. Islom Karimov nomidagi Toshkent xalqaro aeroportida o'tgan tadbirda MOQ raisi Rustam SHoabdurahmonov, Turizm va sport vazirining o'rinbosari Avaz Karimov, MOQ Bosh kotibi Oybek Kasimov Qo'mita raisining o'rinbosari Azizjon Kamilov, O'zbekiston Respublikasi Mudofaa vazirligi mutasaddilari, sportchilarimizning yaqinlari va ko'p sonli muxlislar ishtirok etishdi.

Delegaciyamiz Amman-Dubay-Toshkent yo'nalishida yurtimizga qaytib kelishdi. Mutasaddilar sportchilarimizni qo'lga kiritilgan tarixiy g'alaba bilan qutlashar ekan, Yangi O'zbekiston yoshlariga bo'lajak Olimpiya o'yinlarida ham yurtimiz sharafini munosib himoya qilishlarini tilab qolishdi.

Musobaqada ayollar o'rtasida Nigora Tursunqulova -67, Svetlana Osipova +67 kg, yosh yigitimiz Ulug'bek Rashitov esa -68 kg vazn toifalarida final yo'llanmasi qatorida Tokio-2020 ishtirokchisiga aylanishgan edi. SHu tariqa, taekvondo bo'yicha terma jamoamiz Olimpiya o'yinlarida ilk bor 4 nafar sportchi bilan ishtirok etadigan bo'lishdi. Eslatib o'tamiz, bungacha Nikita Rafalovich -80 kg vazn toifasida jahon reytingi orqali Olimpiadaga yo'llanma olgan edi.