06 dek 17:10
Yangiliklar
O'zbekiston chempionatining tantanali ochilish marosimi bo'lib o'tmoqda FOTOREPORTAJ
Ayni daqiqalarda musobaqaning yorqin lahzalarga boy tantanali ochilish marosimi bo'lib o'tmoqda. Marosimni O'zbekiston Respbulikasi Bosh vaziri o'rinbosari Aziz Abduhakimov kirish so'zi bilan ochib berdi.
"Assalomu alaykum, qadrli murabbiylar, dzyudochilar, musobaqa ishtirokchilari! Sizlar bilan poytaxtimizdagi muhtasham “Universal” sport saroyida ko'rishib turganimizdan xursandmiz. Bugun uchinchi kundirki, ushbu arena dzyudo bo'yicha kattalar o'rtasidagi O'zbekiston chempionatiga mezbonlik qilmoqda. Pandemik vaziyat ancha yumshab, deyarli barcha sport turlari bo'yicha Respublika miqyosidagi musobaqalar o'tkazilyapti. Sportchilar uzoq tanaffusdan so'ng yana musobaqalarga qaytishdi. SHu birgina “Universal” majmuasini oladigan bo'lsak, deyarli ikki oydan beri mazkur arenada boks, taekvondo, dzyudo kabi sport turlari bo'yicha turli yosh toifasidagi O'zbekiston chempionatlari o'tkazildi. Arenaning bo'sh kuni yo'q. Bu kishini quvontiradigan holat. Sport saroylari, zallar yoshlar bilan qanchalik gavjum bo'lsa, bu bizning yutug'imizdir.
Bugungi kunda hurmatli Prezidentimiz SHavkat Miromonovich tomonlaridan ilgari surilayotgan eng ustuvor yo'nalish – bu shubhasiz jamiyatda sog'lom turmush tarzini yanada qaror toptirish, xalqimiz salomatligini aynan sport orqali mustahkamlashdan iboratdir. Bu kabi o'tkazilayotgan musobaqalar sportning yoshlar orasida ommalashishiga xizmat qiladi. Dzyudo Olimpiya o'yinlari oilasiga mansub va shu bilan birga ommaviy sport turi hisoblanadi. SHundan bo'lsa kerak, bu yakkakurash bilan shug'ullanayotganlar soni anchayin salmoqli. Raqamlarga etibor qaratadigan bo'lsak, hozirda mamlakatimizda dzyudo bilan shug'ullanayotganlar soni 50 mingdan oshgan. Bu son kundan-kunga ortib bormoqda. Mayli, ularning hammasi ham terma jamoa darajasiga ko'tarilmas, lekin sport bilan shug'ullanish orqali o'z sog'liklarini taminlaydilar. Bizga esa aynan sog'lom avlod, sog'lom millat kerak.
Qadrli musobaqa ishtirokchilari, fursatdan foydalanib, sizlarga mustahkam sog'liq, murosasiz kechayotgan bellashuvlarda esa g'alaba yor bo'lishini tilayman! Tatamida eng kuchlilar zafar quchsin!", - dedi A.Abduhakimov.
Davlatimiz madhiyasi yangragach, Rio-2016 Paralimpiya o'yinlarida g'olib va sovrindor bo'lgan para-dzyudochi qizlarimiz mahorat saboqlarini namoyish etishdi. SHundan so'ng o'zbek va jahon dzyudosi yulduzlariga navbat keldi. Olimpiada chempioni, uch karra jahon chempioni, terma jamoamiz bosh murabbiyi Ilias Iliadis, terma jamoamiz azolari Davlat Bobonov, SHarofiddin Boltaboev, Muhammadkarim Hurramov, yurtimizda yig'in o'tkazayotgan Gruziya terma jamoasining nomdor dzyudochilari tatamidagi chiqishlari bilan arenaga yig'ilganlarning olqishiga sazovor bo'lishdi.
"Men O'zbekistonda sportga qaratilayotgan hukumat darajasidagi etibor, qo'llab-quvvatlashni dunyoning hech bir mamlakatida ko'rmaganman. SHaxsan O'zbekiston Prezidenti SHavkat Miromonovich Mirziyoev sport va sog'lom turmush tarziga etibor qaratmoqda. Bu esa o'z samarasini bermay qolmayapti. Fursatdan foydalanib, barcha ishtirokchilarga omad va g'alaba tilaymiz", - dedi I.Iliadis.
SHundan so'ng tantanali ochilish marosimining badiiy qismiga navbat berildi. Yosh ijrochilar va estradamiz yulduzlarining chiqishlari O'zbekiston chempionatining ochilish marosimiga o'zgacha fayz bag'ishlamoqda.
Suratlar muallifi - Jahongir FAYZULLAEV, o'z muxbirimiz
Fikrlar