O'zbekiston delegaciyasi AQSHda boshlanayotgan XI Jahon o'yinlariga jo'nab ketdi

Dunyoning 110 mamlakatidan taxminan 3600 nafar sportchi ishtirokida kechadigan bellashuvlarda hamyurtlarimiz ham qatnashadilar.

Jahon o'yinlari har 4 yilda o'tkaziladigan, dasturining aksariyati noolimpiya sport turlaridan tashkil topgan kompleks musobaqa hisoblanadi. O'tgan yili o'tkazilishi lozim bo'lgan musobaqa epidemiologik vaziyat sabab 1 yilga surilgan.

Reglamentga ko'ra, musobaqada ishtirok etish uchun sportchilar o'z yo'nalishlarida jahon chempionligini qo'lga kiritgan bo'lishlari yoki malum kvalifikacion musobaqadan o'tishlari kerak. Bu yilgi Butunjahon o'yinlarida Doston Otabolaev (karate), Ekaterina Fetisova (badiiy gimnastika), Darya Latisheva (ushu), Bahromjon Masharipov (jiu-jitsu), Fanat Qahramonov (muay-tay) yurtimiz sharafini himoya qilishadi.

8-9 iyul: Dostonbek Otabolaev (karate);

12-13 iyul: Ekaterina Fetisova (badiiy gimnastika);

13 iyul: Darya Latisheva (ushu);

15 iyul: Bahromjon Masharipov (jiu-jitsu);

15-17 iyul: Fanat Qahramonov (muay-tay).

Umuman, musobaqa dasturida akrobatika, rollerda figurali uchish, sohil voleyboli, bouling, sumo, arqon tortish kabi 30 ta sport turini uchratish mumkin. Musobaqa tarixida jamoamiz 1997 yil 1 tadan oltin va kumush, 2005 yil 1 ta bronza medaliga sazovor bo'lgan.

Hozirda Doston Otabolaev murabbiyi O'ktam Bekpo'latov bilan Birmingem shahrida etib borgan. Delegaciyamizning asosiy qismi esa bugun okean ortiga yo'l oldi.