O'zbekiston Kubogida "sensaciya"! Xorazm viloyati Kubok sohibiga aylandi

Musobaqada Qoraqalpog'iston Respublikasi, viloyatlar hamda Toshkent shahridan 100 nafarga yaqin 2006-2007 yillarda tavallud topgan o'smir qizlar medallar uchun bahs olib borishdi. Ikki kun davom etgan va 10 ta vazn toifasida tashkil etilgan bellashuvlarda biroz kutilmagan natija kuzatildi.

Xorazm viloyati ayollar kurashi jamoasi mamlakatimizda etakchi hisoblangan Qoraqalpog'iston Respublikasi va Navoiy viloyati jamoalarini ortda qoldirib, O'zbekiston Kubogi sohibiga aylandi. Qoraqalpog'istonlik kurashchi qizlar ikkinchi o'rinni band etishgan bo'lsa, kuchli uchlikka mezbonlar Navoiy viloyati jamoasi yakun yasab berdi. 

"Xorazmlik kurashchi qizlarning natijasidan xursand bo'ldik. Bu raqobat va rivojlanishdan darak. O'smirlarimiz jahon va Osiyo chempionatlarida munosib ishtirok eta olishlarini isbotlashdi. Bosh murabbiy sifatida shaxsan men bunga ishonaman", - deydi mamlakat o'smirlar terma jamoasi bosh murabbiyi To'ymurod Adizov.

SHuningdek, O'zbekiston Kubogi doirasida murabbiylar va hakamlar uchun seminar ham o'tkazildi.