O'zbekiston terma jamoasi jahon chempionati yakkalik bahslaridagi ishtirokini yakunladi

Xabar berganimizdek, bugun og'ir vazn (ayollar +78, erkaklar +100 kg) toifasida g'olib va sovrindorlar aniqlanadi. Bugungi bellashuvlarda medal yo'lida so'nggi umidlarimiz bo'lgan Irisxon Qurbonboeva hamda Parij-2024 Olimpiadasi sovrindorlari Muzaffarbek To'raboev va Alisher Yusupov tatamiga chiqdi. 

Afsuski, birinchi bosqichdan muvaffaqiyatli o'tib olgan dzyudochilarimiz ikkinchi davrada mag'lubiyat alamini totib ko'rishdi. O'tgan yildan eng og'ir vaznga o'tgan Qurbonboeva yaponiyalik raqibasiga imkoniyatnni boy berdi. To'raboev IJF bayrog'i ostida kurashayotgan Inal Tasoevga, Yusupov esa ikki karradan Olimpiada va jahon chempioni, chexiyalik Lukash Krpalekka yutqazdi. Alisherning mag'lubiyati ayniqsa alamli bo'ldi. Ikkita yuko bahsi bilan borayotgan dzyudochimiz hujumga berilib ketishi natijasida alamli mag'lubiyatni qabul qilib oldi. 

SHu tariqa, O'zbekiston terma jamoasi jahon chempionatidagi ishtirokini medalsiz yakunladi. So'nggi bor 2018 yilgi jahon chempionatida shunday holat kuzatilgandi. Terma jamoamizda murabbiylar shtabi almashgan, dzyudochilarning aksariyati uchun bu ilk jahon chempionati bo'ldi. Mana shu omillar omadsiz ishtirokimizga sabab bo'ldi. 

Umid qilamizki, ertaga o'tkaziladigan aralash jamoaviy bahslarda terma jamoamiz jahon chempionati medallariga ega chiqadi. Ilk davrada Turkmaniston terma jamoasiga qarshi tatamiga chiqamiz.