O'zbekiston va BAA dzyudo federaciyalari hamkorligi yangi bosqichda!

Ikki qitaning ko'zga ko'ringan dzyudochilari qatorida o'zbekistonlik sportchilar ham nufuzli musobaqada munosib tarzda ishtirok etishyapti. Osiyo chempionati doirasida O'zbekiston dzyudo federaciyasi rahbariyati ham izchil ish olib bormoqda. 

Jumladan, O'zbekiston dzyudo federaciyasi prezidenti Azizjon Kamilov Dubay shahrida BAA dzyudo, sport kurashlari hamda kikboksing federaciyalari prezidenti Muhammad Bin Talub Al Deriyaning taklifi bilan uchrashuv o'tkazdi. Bu bejiz emas, albatta. O'zbek dzyudosi qitada o'z o'rniga ega bo'lib, juda ko'plab mamlakat federaciyalari biz bilan hamkorlik qilishni o'z oldiga maqsad qilib qo'yadi.  

O'zbekiston va BAA dzyudo federaciyalari rahbarlarining uchrashuvi chog'ida tomonlar har ikki mamlakat dzyudo federaciyalarining hamkorligini yangi bosqichga olib chiqish, dzyudochilarning qo'shma yig'inlarini tashkil etish, murabbiylarning tajriba almashinuvini taminlash, murabbiylar va hakamlar uchun turli seminarlar o'tkazish kabi masalalarni muhokama qilishdi. 

Uchrashuv so'nggida Azizjon Kamilov va Muhammad Bin Talub Al Deriya o'zaro esdalik sovg'alari almashishdi.